Erteginiń eń jas qatysýshysy 7 jasta
Almatydaǵy qazaq memlekettik sırkinde búginnen bastap «Qar hanshaıymy» atty jańajyldyq qoıylym halyń kórermenge jol tartty, dep habarlaıdy Almaty-akshamy.kz Baq.kz-ke silteme jasap.
Qoıylymda birneshe halyqaralyq festıvaldardyń júldegerleri men sırk kolejiniń stýdentteri óner kórsetedi. Erteginiń eń jas qatysýshysy 7 jastaǵy Danat Dosbatyrov. Ol sırkte óner kórsetip júrgen Danatovtar áýletiniń úshinshi býyny.
Qazaq memlekettik sırkiniń dırektory Baqyt Bokebaev bıyl balalar úshin ertegi taqyrybyn ádeıi tańdaǵandaryn jetkizdi.
«Qar hanshaıymy» ertegisi buryn keń taraǵan, alaıda qazirgi balalar ony jóndi bile bermeıdi. Sony biz jańa qyrynan berip otyrmyz. Onyń ústine balalar erteńgi kúnnen jaqsylyq kútedi, sondyqtan osy ertegini ádeıi tańdadyq, kez kelgen ertegi jaqsylyqpen aıaqtalady, ıaǵnı jas urpaqty adamgershilikke tárbıeleýde mańyzy zor», - dedi ol.
Sonymen qatar ol qazir tek sırkten bólek dramatýrgıa, operada jańa qoıylymdardy tamashalaý qıynǵa soǵyp otyrǵanyn jetkizdi. Óıtkeni jańa shyǵarma jazyp jatqan dramatýrgter az.
«Qazir qoılymdardyń senarıin ózim daıyndap júrmin. Mátindi, ondaǵy óleńderdi qazaqshalaımyn. Buryn sırktik qoıylymdardyń barlyǵy orys tilinde qoıylyp kelse, qazir eki tilde júredi. Búgingi ertegi de eki tilde beriledi. Óıtkeni kórermenniń eshqaısysyn alalamaýymyz kerek. Onyń ústine Qazaqstanda turyp, qazaqsha qoıylym qoıa almasaq onda memlekettik tildiń ıdeologıasyn durys qoldamaǵan bolamyz», - dedi Baqyt Bokebaev.
Sóz arasynda ol dramatýrgıany sırk ónerimen baılanystyryp qoıý úlken sheberlik pen shyǵarmashylyqty qajet etetinin jetkizdi.
«Bul ertegini dramatýrgıada, operada qoıý álde qalaı ońaı. Al, sırkte dramatýrgıany baılanystyryp, ártisterdi aspanǵa ushyryp, at jáne basqa da ańdardyń sırktik trúkterimen qabystyryp bere bilýiń kerek, ıaǵnı ár qoıylymnyń arasynda úndestik bolý qajet. Úndestik bolmasa óner kórinbeıdi, sondyqtan munyń barlyǵy úlken jumys», - dedi sırk dırektory.
Bul jeti jastaǵy Danat Dosbatyrov úshin debúttik qoıylym bolyp otyr. Ol Kaıdiń rólin oınap qana qoımaı, baýmen kókke kóterilip sırktik nómirlerdi oryndaıdy. Aıý, jylqy jáne basqa da janýarlardyń qatysýymen ótetin qyzyqty qoılym kópshilikti tánti etpeı qoımaıdy.
Jańajyldyq baǵdarlama 2022 jyldyń 9 qańtaryna deıin jalǵasady.