Halyqaralyq balalardy qorǵaý kúnine oraı AMANAT partıasy Almaty qalalyq fılıaly men Qazaq memlekettik sırki ókilderi almatylyq kishkentaı dostarǵa arnap sırk qoıylymyn uıymdastyrdy.
Merekelik qoıylymǵa "Áleýmettik qorǵaý salasyn damytýdyń Ulttyq ǵylymı ortalyǵynan", "Úmit" sańyraý múgedekterdi qoldaý ortalyǵynan, "Taǵdyr" múgedek balalar otbasylyq klýbynan, "Bıik beleske baǵyt", "Úmitińdi úzbe", "Arǵymaq", "Ana tilegi", "Qaıyrymdyq kerýeni", "Alataý analary", "Shyńǵa órleý" qorlarynan, Almaly, Medeý, Bostandyq, Naýryzbaı, Túrksib, Alataý aýdandarynyń múgedekter qoǵamynan, "Aıala", "Shapaǵat", "Parasat" áleýmettik qyzmet kórsetý ortalyqtarynan, "Qazaqstan Respýblıkasynyń Ardagerler uıymy", "Qamqorlyq ortalyǵy - Hesed Polına", "Qazaq zaǵıptar qoǵamy", "Erekshe balalardyń ata-analary odaǵy" qoǵamdyq birlestikterinen, "Nur" qaıyrymdylyq otbasylyq balalar úıinen jetkinshekter shaqyryldy. Sondaı-aq, sırkti almatylyq oqý ozattary, daryndy balalar, shyǵarmashylyq, olımpıada jáne sporttyq saıystardyń jeńimpazdary, barlyǵy 100 bala tamashalady.
Almaty sırkiniń tórinde balalar aldynda eń bedeldi Halyqaralyq sırk festıválderiniń jeńimpaz artıseri óner kórsetti. Áýede qalyqtaǵan gımnasttardyń, manejge shyqqan kóńildi kloýndardyń, tipti, súıkimdi ıtterdiń, epti mysyqtardyń, aqyldy qonjyqtyń ónerine máz bola qol soqqan baldyrǵandardyń qýanyshynda shek bolǵan joq.
– Bizge osyndaı jarqyn sátter syılaǵan jandarǵa alǵys aıtamyn. Osynaý ómirdiń kúndelikti kúıki tirligi bitken be, kishkentaı qyzym úshin ýaqytymdy bólip kelgen edim, óte jaqsy áser aldym. Ózim de bir serpilip, demalyp qaldym. Qyzym máz bolyp, teledıdardan kórip júrgen aıýyn búgin kózimen kórgenine qýanyp, qaıta-qaıta qol shapalaqtap otyrdy. Men sekildi erekshe bala tárbıelep otyrǵan ata-analarǵa sabyr, tózim jáne osyndaı jaqsy kúnderdiń mol bolýyn tileımin, – deıdi almatylyq Sáýle Serperova.
Iá, bala tabıǵatyna alańsyz ómir, shattyq, qýanysh tán ǵoı, olar ásirese, álemge áıgili "Bez noskov" kloýn trıosynyń ónerine tánti bolyp, uzaq qol soǵyp otyrdy.
Qýansa, bala qýansyn!