Sý aıdyndaryndaǵy qaýipsizdikti qamtamasyz etý – Almaty qalasy Tótenshe jaǵdaılar departamentiniń negizgi mindetiniń biri. Shomylý maýsymy kezinde azamattardyń ómiri men densaýlyǵyn qorǵaý maqsatynda departament mamandary basqa da quzyrly organdarmen birlesip kún saıyn tynbaı jumys istep jatyr. Óńirlik komýnıkasıalar qyzmetinde TJD Tótenshe jaǵdaılardyń aldyn alý basqarmasynyń bastyǵy Denıs Iarsev jaz kezinde qolǵa alynǵan osyndaı is-sharalar týraly aıtyp berdi.
TJD málimetinshe, qala men taýǵa jaqyn aýmaqtarda 44 sý aıdyny bar bolsa, olardyń 9-y halyq úshin qaýipti dep tanylǵan. Úlken jáne Kishi Almaty ózenderi, Pervomaı toǵandary, Saıran kóli, Iýnnat, Áýejaı mańy kólderi men basqalary qazir osyndaı qaýipti aımaqtyń qataryna kirgen.
Almatyda shomylýǵa ruqsat etilgen tórt aımaq belgilengen: Saıran kóliniń batys jáne shyǵys jaǵalaýy, «Gúlder» demalys aımaǵy jáne D. Qonaev atyndaǵy Úlken Almaty kanaly boıyndaǵy Baým toǵaıynyń jaǵajaı aımaǵy. Úlken Almaty kanalyn jóndeýden ótkizý úshin qurǵatyp qoıǵan.
«Sý aıdyndaryndaǵy qaýipsizdikti qamtamasyz etý – bir rettik aksıa emes, bul aldyn alý, sıfrlandyrý, reıdter men keń kólemdi aqparattyq naýqandy qamtıtyn júıeli jumys», – dep atap ótti Denıs Iarsev.
Maýsym basynan beri eń qaýipti jerlerde 50 eskertpe jazý men sýǵa túsýge tyıym salatyn 98 belgi qoıylypty. Sonymen qatar, jeti jerde táýlik boıy baqylaý júrgizetin ıntellektýaldy baqylaý kameralary ornatylǵan.
Profılaktıkalyq jumystarǵa polısıa, áskerı qyzmetkerler, qutqarýshylar men eriktiler de atsalysyp jatyr. Sońǵy birneshe aıda qaýipsizdik erejesin buzǵan 14 adam ákimshilik jaýapkershilikke tartylyp, sý mańynda ishimdik ishken 8 adamǵa aıyppul salynypty.
Sondaı-aq, Tótenshe jaǵdaılar mınıstriniń buıryǵymen bekitilgen «Mamyr qaýpi» jospary aıasynda 25 is-sharadan turatyn keshendi jumys júrgizile bastady. Aqparattyq-túsindirý jumysyna erekshe kóńil bólingen. Maýsymnyń basynan beri mektepterde, HQKO-larda, saýda oıyn-saýyq ortalyqtarynda, emhanalarda, vokzaldar men metropolıtende beınerolıkter, jadynamalar men dárister taratylyp, smartbordtar men LED-ekrandar arqyly qala turǵyndaryn qulaqtandyrý da qolǵa alyndy.
Qorytyndylaı kele, ÓKQ alańynda sóılegen spıker sý aıdyndaryndaǵy qaýipsizdikti qamtamasyz etý – qalalyq TJD jumysynyń basym baǵyty ekenin, ár almatylyq sýdyń janynda abaı bolýy kerektigin eskertip ótti.