Almatyda jaz mezgili taıap, qala turǵyndary sý jylynýyn kútpesten, shomylý maýsymyn bastap ketti.
Osy rette qalalyq qutqarýshylar sýdaǵy qaýipsizdikti saqtaýǵa shaqyryp, jaýapsyzdyqtyń arty aýyr zardaptarǵa ákep soǵatynyn eskertti. Ótken jyly kúsheıtilgen profılaktıkalyq sharalar nátıjesinde qala sý aıdyndarynda adam ólimine jol berilmedi, 17 adam qutqaryldy, onyń ishinde 6-ýy bala (Saıran kólinde), dep habarlaıdy Almaty-akshamy.kz.
ÓKQ brıfıńinde Almaty qalasy TJD Azamattyq qorǵanys basqarmasynyń basshysy Ánýar Iýsýpov óz usynystaryn aıtty.
«Almaty qalasy men taý bókterindegi aımaqtarda 44 sý qoımasy bar. Bul ózender, kólder, arnalar, toǵandar, onyń 12-si sýǵa túsý maýsymynda turǵyndarǵa qaýip tóndiredi», - dep habarlady Á. Iýsýpov.
Sýdaǵy jazataıym oqıǵalardyń aldyn alý maqsatynda Departamentpen polısıa qyzmetkerleri, QR UK áskerı qyzmetshileri, qutqarý qyzmetiniń jáne RQJQ qutqarýshylary, sondaı-aq eriktilermen birlesip reıdtik is-sharalar júrgizedi.
«Biz sý aıdyndaryndaǵy qoǵamdyq tártipti buzǵandardyń barlyǵyn ákimshilik jaýapkershilikke tartamyz. Máselen, ótken jyly ákimshilik kodekstiń 440-baby boıynsha 63 adamǵa jalpy somasy 790 myń teńge aıyppul salyndy», - dep qosty ol.
Qazirgi ýaqytta Departament BAQ arqyly aýqymdy úgit-nasıhat jumystaryn júrgizip, barlyq bilim berý jáne densaýlyq saqtaý nysandarynda, halyq kóp shoǵyrlanatyn oryndarda (SOO, SÚ, HQKO, vokzaldar, metropolıten, kınoteatrlar), sondaı-aq Almaty qalasynyń joldary boıynda ornalasqan smartbordtar men LED – ekrandarda beınerolıkter kórsetilimderi belsendi júrgizilýde. Saıran kóliniń boıyndaǵy (batys jáne shyǵys) jáne Qonaev qalasyna shyǵatyn joldaǵy bılbordtarda «Sýdaǵy qaýipsizdik» taqyrybynda elektrondy bannerler ornatyldy.
TJD málimetinshe, Almatyda balalardy júzý daǵdylaryna úıretetin 56 júzý baseıni bar (oqý merzimi 3 aı). Sonymen qatar, qalanyń jalpy bilim beretin mektepteriniń 6 baseıninde oqý-jattyǵý jumystary júrgiziledi. Búgingi tańda 6 myńǵa jýyq bala oqytyldy. Júzýdi úıretý balalardyń sýdaǵy qaýipsizdik erejelerin bilý deńgeıin arttyrady.
Sonymen qatar qalada «Damý bala» baǵdarlamasy iske qosylyp, onda 3500 jýyq bala júzýden tegin oqýǵa jazyldy.
Qutqarýshy qala turǵyndary men qonaqtaryn sý aıdyndaryndaǵy qaýipsizdik erejelerin saqtaýǵa, sondaı-aq tyıym salynǵan jerlerde sýǵa túspeýge shaqyrdy. Sýǵa túsý maýsymynda sýǵa túsýge tyıym salynǵan jerlerde 70 «Sýǵa shomylýǵa bolmaıdy» belgisi, sondaı-aq 11 aqparattyq stend ornatyldy.