Mamandar ata-analardy, balalardy sý aıdynyndaǵy talapty buzbaýǵa, kóshe men úıdegi qaýipsizdik erejelerin oryndaýǵa shaqyrady.
Apattardyń kópshiligi jabdyqtalmaǵan sý qoımalarynda oryn alady. Almaty qalasynyń TJD qyzmetkerleri talapty oryndaýǵa jáne qaýip tóndirmeýge shaqyrady, dep habarlaıdy Almaty-akshamy.kz.
Óńirlik komýnıkasıalar qyzmetiniń brıfıńinde 9 maýsymda ótken Almaty qalasy Tótenshe jaǵdaılar departamenti basshysynyń orynbasary, polkovnık Erlan Álibekov qala turǵyndaryn sýdaǵy qaýipsizdik erejelerin saqtaýdy, tyıym salynǵan oryndarǵa barmaýdy eskertti.
Erlan Álibekov barlyq qutqarýshylar qala turǵyndarynyń «jabaıy» jaǵajaılar men demalys oryndaryna barýyna alańdaıtynyn aıtty. Onyń aıtýynsha, keıbir jaǵajaılarda sý aǵyny qatty, aǵymdar, tereńdiktiń kúrt ózgerýine yqpal etetin jartastar, synǵan plıtalar men áınek bolýy múmkin.
Spıker búginde Almaty qalasynda shomylýǵa ruqsat etilgen 4 oryn baryn eske saldy, olar:
- Saıran kóli – Tóle bı kóshesinen ońtústik baǵytta 200 metr – Almaly aýdany;
- Saıran kóli – Tóle bı kóshesinen pırske deıin ońtústik baǵytta 300 metr – Áýezov aýdany;
- D. Qonaev atyndaǵy ÚAK – Baým toǵaıy – Túrksib aýdany;
- D. Qonaev atyndaǵy ÚAK – demalys aımaǵy Gúlder – Jetisý aýdany.
«Saıran» kóliniń ruqsat etilgen jerlerinde shyǵys pen batys jaǵynan býıkalar ornatylǵan.
Úlken Almaty kanalyna (Baým toǵaıy, Gúlder demalys aımaǵy qaıta qurýǵa baılanysty) osy jyly sý toltyrý josparlanbaǵan.
Erlan Álibekovtiń aıtýynsha, «jabaıy» jaǵajaılarda shomylý qaıǵyly oqıǵalarǵa ákelýi múmkin ekenin eskertti. Polkovnık ata-analardyń jazǵy demalys kezinde balalardyń qaýipsizdigine jete nazar aýdarýdy aıtty.
Spıker jyl saıyn Almatynyń jaǵajaılarynda adam óliminiń oryn alatynyn eske saldy. Erlan Álibekovtyń pikirinshe, tájirıbe men baqylaýǵa qaramastan qaıǵyly oqıǵalar erejeniń buzylýynan bolady.
Polkovnık TJ departamentiniń qyzmetkerleri polıseılermen birlesip kún saıyn QR ákimshilik kodeksniń 440-baby boıynsha (spırttik ishimdikter ishý nemese qoǵamdyq oryndarda mas kúıde bolý) tártip buzǵandardy ákimshilik jaýapkershilikke tartýda ári sý aıdyndarynyń aýmaǵynda patrúlder kezekshilikterin atqarýda. Jaz maýsymynda tártip buzǵan 15 adamǵa aıyppul salyndy.
Almaty qalasynyń Saıran kólinde qutqarý qyzmetiniń maýsymdyq beketi qoıylyp, shomylýǵa tyıym salatyn 14 taqtaısha ornatyldy. Áýejaı kólinde stasıonarlyq qutqarý beketi jumys isteıdi. Sondaı-aq osy jazda Almaty sý aıdyndarynda qutqarýshylar, sýda qutqarý jasaǵynyń qyzmetkerleri, polısıa qyzmetkerleri men QR Ulttyq ulanynyń №5571 «Ońtústik» bóliminiń áskerı qyzmetshileri kezekshilik etedi. Endi qutqarýshylar tek qaıyqtarda ǵana emes, dronnyń kómegimen qaýipsizdikti qadaǵalaıtyn bolady.
Erlan Álibekov sý aıdyndarynda saqtalýy tıis birneshe talaptardy aıtty.
«Ruqsat etilgen jerde ǵana shomylyńyz, jaǵalaýdyń qorshaý belgileri men býıkalarynan alys júzýge bolmaıdy. Eger siz ruqsat etilgen jerde shomylsańyz, belden joǵary sýǵa túspeńiz. Balalardy qaraýsyz qaldyrmańyz. Qaıyqtardan, kópirler men aılaqtardan sýǵa sekirmeńiz. Túngi ýaqytta, taý ózenderinde mas kúıinde shomylmańyzdar», – dep eskertedi Almaty TJD bastyǵynyń orynbasary.
Óz kezeginde Almaty qalasy Bilim basqarmasynyń adamgershilik-rýhanı tárbıe men ózin-ózi taný bóliminiń basshysy Nurgúl Taý ata-analardy balalardy sý aıdynyndaǵy talapty buzbaýǵa, kóshe men úıdegi qaýipsizdik erejelerin oryndaýǵa shaqyrady.