Qoǵamdyq keńester atqarar róli zor, olar demokratıalyq qundylyqtardy nasıhattaý quraly retinde áreket etedi. Almaty qalasynyń ÓKQ alańynda ótken brıfıńte Qoǵamdyq keńes músheleri halyq jáne memlekettik organdarymen jumysy aıtyp ótti, dep habarlaıdy almaty-akshamy.kz.
Almaty qalasy Qoǵamdyq keńesiniń komýnaldyq ınfraqurylym, utqyrlyq, ekologıa, qarjy, aktıvter jáne qaýipsizdik jónindegi №1 komısıasynyń tóraǵasy Borıs Japarov keńestiń jumysy arqyly azamattardyń mańyzdy máselelerdi sheshý prosesine qatysýǵa múmkindigi bar ekenin aıtty.
“Biz úshin mańyzdy másele qala bıligi qabyldaıtyn sheshimderdiń tıimdiligin qamtamasyz etý. Sondyqtan neǵurlym halyq, turǵyndar sheshim qabyldaý prosesine qatysyp, baqylaý múmkindigine ıe bolsa, soǵurlym biz demokratıalyq maqsattarǵa jaqyndaıtyn bolamyz. Almaty qalasy Qoǵamdyq keńesi 2016 jyldan beri jumys isteıdi jáne onyń negizgi maqsaty tek Almatyda ǵana emes, elimizdiń basqa óńirlerinde azamattar arasynda demokratıa qundylyqtaryn damytý bolyp tabylady", - dep atap ótti B. Japarov.
Qoǵamdyq keńestiń quramyna 5 komısıa kiredi, olardyń quramynda 7-den 10-ǵa deıin múshe bar. Atap ótilgendeı, komısıanyń aldyna qoıylǵan mindetterdi olardyń músheleriniń kúshimen ǵana oryndaý múmkin emes, sondyqtan olardyń múmkindikterin keńeıtý úshin arnaıy komıtetter, jumys jáne saraptamalyq toptar qurylyp, sonymen qatar qalanyń belsendi turǵyndary tartylady.
“Mysaly, Almaty qalasyndaǵy qoǵamdyq transport máselesi bárimizdi tolǵandyryp otyrǵan ózekti másele. Qala turǵyndarynan osy másele boıynsha kóptegen usynystar, aryz-shaǵymdar kelip túsedi. Osy jáne basqa da máselelerdi sheshý úshin biz qalalyq mobıldilik basqarmasymen birlesip jumys isteımiz, olardy iske asyrý bizdiń negizgi qyzmetimiz dep aıtýǵa bolady. Sondaı-aq, qoǵamdyq tártip, sybaılas jemqorlyqqa qarsy kúres, ekologıa jáne t.b. máselelerin atap ótýge bolady. Bıyldan bastap, qala jurtshylyǵyn sybaılas jemqorlyqqa qarsy kúreske tartý maqsatynda Qoǵamdyq keńes QR Sybaılas jemqorlyqqa qarsy is - qımyl Agenttiginiń Almaty qalasy boıynsha departamentimen birlesip is-qımyl josparyn ázirledi", - dep tolyqtyrdy B. Japarov.
Kóptegen máselelermen qatar jastar máseleleri de nazardan tys qalmaıdy, bul baǵytta Qoǵamdyq keńestiń qoǵamdyq damý, din, mádenıet, sport jáne jastar isi jónindegi №4 komısıasy aınalysady.
"Almatyda 680 myńnan astam jastar turady. Qandaı problemalar týyndaıdy, eń aldymen, árıne, nashaqorlyq, qumar oıyndar jáne t.b. Jastar saıasaty jónindegi komısıanyń sarapshylary Úkimet pen Májiliske osy máselelerdi sheshý jóninde usynystar joldady. Sonymen qosa, búginde biz sport nysandary men alańdaryna monıtorıń júrgizýdemiz. Sońǵy tórt aıda komıtet músheleri balalar men jasóspirimder sport mektepterin, aýlalardaǵy oıyn alańdaryn tekserýde. Nátıjesinde barlyq eskertýler men usynystar qalalyq ákimdikke, qajet bolǵan jaǵdaıda sport mınıstrligine de joldanatyn bolady",- dep atap ótti komısıa tóraǵasy Nurjan Jaqypov.
Odan bólek, mádenıet jónindegi komısıa tarıhı-mádenı mura obektilerine monıtorıń júrgizýdi josparlap otyrǵany ataldy.