Almaty qalasynyń ákimi Darhan Satybaldy jumys sapary aıasynda birqatar qurylys nysanyn aralady.
Atap aıtqanda, olar Nazarbaev dańǵylynyń batys jaǵynda, Gandı kóshesiniń soltústiginde ornalasqan jańa skver, sondaı-aq «Altyn Sıtı» jáne «Jeti Qazyna» turǵyn keshenderinde salynyp jatqan mektepter, - dep habarlaıdy Aqshamnews.kz.
Aldymen ákim Nazarbaev dańǵylynyń batysynda jáne Gandı kóshesiniń soltústiginde ornalasqan skverdiń qurylysyn kórip shyqty. Respýblıka kúnine oraı ashý josparlanǵan nysan qazir 97% daıyn.
Skver aýmaǵynda qysta muz aıdyny retinde paıdalanylatyn toǵan salyndy. Búginde júrginshiler men júgirý joldary, asfált jabyndysy, avtosýarý jáne syrtqy jaryqtandyrý júıesin ornatý jumystary aıaqtalýǵa jaqyn. 95 qylqanjapyraqty jáne 228 japyraqty kóshet otyrǵyzyldy, qosymsha 469 qylqanjapyraqty jáne 384 japyraqty buta, sondaı-aq kópjyldyq ósimdikter egilgen. Sonymen qatar eski qorshaýdyń metal qurylymdary men irgetasyna restavrasıa jumystary júrgizilip jatyr.
Qurylys tolyq aıaqtalǵan soń skver qala turǵyndary men qonaqtary úshin jańa demalys aımaǵyna aınalmaq. Darhan Satybaldy jaryq shamdarynyń sanyn arttyrýdy jáne kógaldandyrý kezinde jergilikti taldar men butalardyń túrine basymdyq berýdi tapsyrdy.
Ári qaraı ákim «Altyn Sıtı» turǵyn kesheninde 1 500 oryndyq mekteptiń qurylys barysymen tanysty. Joba «Keleshek mektepteri» ulttyq jobasy aıasynda qolǵa alynǵan. Qazirgi daıyndyq deńgeıi 70%. Qurylysqa 130 jumysshy jáne 8 birlik arnaıy tehnıka jumyldyrylǵan. Nysandy osy jyldyń sońyna deıin paıdalanýǵa berý josparlanǵan.
Joba boıynsha mektep aýmaǵynda fýtbol alańy, sport jáne akt zaly, asqana, oıyn jáne sport alańshalary, sondaı-aq kóriktendirilgen aýmaq qarastyrylǵan. Mektep zamanaýı jabdyqtarmen jáne ulttyq standarttarǵa saı oqý kabınetterimen qamtamasyz etiledi.
Sapar sońy «Jeti Qazyna» turǵyn kesheniniń mańynda salynyp jatqan 2 000 oryndyq mekteppen aıaqtaldy. Bul joba da «Keleshek mektepteri» ulttyq jobasy aıasynda boı kóterip jatyr. Nysan 40% daıyn. Qurylysqa 95 jumysshy jáne 10 birlik tehnıka tartylǵan. Mektepti de jyl sońyna deıin paıdalanýǵa berý kózdelip otyr. Onda zamanaýı oqý kabınetteri, sport jáne akt zaldary, fýtbol alańy, asqana, balalar alańshalary men kóriktendirilgen aýmaq bolady.
Jumys saparyn qorytyndylaǵan qala ákimi barlyq qurylys nysanynda jumysshylar men arnaıy tehnıkanyń sanyn kóbeıtýdi, sondaı-aq qurylys jumystaryn merziminde aıaqtaýdy tapsyrdy.