Jańa jyl merekesin asyǵa kútetin balalar. Aýyryp, aýrýhanaǵa túsken balalar úshin bul mereke, ásirese, mańyzdy.
Prezıdenttiń tapsyrmasyna sáıkes balalardy Jańa jylmen quttyqtaýǵa erekshe kóńil bólindi. Bıyl Almatyda dástúrli túrde mektepterde, áleýmettik ortalyqtarda, balalarǵa beıimdeý jáne kómek kórsetý ortalyqtarynda balalarǵa arnalǵan shyrshalar, sondaı-aq HÁOT sanatyndaǵy balalar men múmkindigi shekteýli balalarǵa arnalǵan shyrshalar ótkizildi.
Almatyda Balalar jedel medısınalyq kómek kórsetý ortalyǵyndaǵy 50 bala qala ákiminiń atynan jańajyldyq syılyqtar aldy. Kishkentaı emdelýshilerdi qoǵamdyq densaýlyq saqtaý basqarmasynyń basshysy Iran Shámetekov quttyqtady, dep habarlaıdy Almaty-akshamy.kz.
Em alyp jatqan balalar úshin qonaqtardyń kelýi tosyn syı boldy. Balalarǵa syılyqtar taratylyp, tilekter aıtyldy. Emdelýshilerdiń kóńil-kúıi áp-sátte kóterile tústi. Al jaqsy kóńil-kúı densaýlyq kepili ekeni sózsiz.
«Úıge, jaqyndaryńyzǵa oralý úshin tezirek saýyǵyp ketýdi tileımin. Senderge zor densaýlyq, qyzyqty jańajyldyq demalys pen shynaıy qýanyshty sátter tileımin», - dep Iran Shámetekov Jańa jyldy aýrýhanada qarsy alýy múmkin balalardy qoldady jáne medısına qyzmetkerlerine atqaryp jatqan jumysy úshin alǵys aıtyp, aldaǵy merekelerimen quttyqtady.
«Balalardy Jańa jylmen quttyqtaý jáne olar úshin mereke uıymdastyrý – bizdiń jyl saıynǵy dástúrimiz. Sońǵy eki jyl pandemıanyń kesirinen merekeleýden bas tartýǵa týra keldi. Al bıyl balalarǵa jańajyldyq mereke syıladyq. Aýrýhanada 160-qa jýyq bala emdelip jatyr, osy joly olarǵa Jańa jyl merekesin ótkizip jiberýge eshteńe sebep bolmaıdy dep sheshtik. Balalar jedel járdem ortalyǵynda 13 klınıkalyq bólimshe bar. Ár bólimshede balalar úshin erekshe shoý-baǵdarlamasy bar erteńgilikter ótti», - deıdi Balalar shuǵyl medısınalyq kómek kórsetý ortalyǵynyń bas dárigeri Álibek Smaǵulov.
Eske salaıyq, Balalar jedel medısınalyq kómek kórsetý ortalyǵy 0-18 jas aralyǵyndaǵy balalarǵa shuǵyl jáne josparly hırýrgıalyq kómek kórsetedi. Munda emdeýdiń ınovasıalyq hırýrgıalyq ádisteri qoldanylady, kúnine 300-den astam bala aýrýhananyń qabyldaý bólimine júginedi.
Munda hırýrgıalyq kómek, travmatologıa, ýrologıa, nefrologıa, balalar nevrologıasy, oftalmologıa jáne toksıkologıalyq kómek kórsetiledi. Ortalyqta sonymen qatar neonataldy hırýrgıa bólimi men týa bitken patologıasy bar jańa týǵan nárestelerdi kútýge arnalǵan reanımasıa bólimi bar. Ortalyqta elimizdiń túkpir-túkpirinen kúıik pen úsikke shaldyqqan balalar jedel jáne ońaltý emin alady.