Almaty qalasy, Túrksib aýdany №11 jalpy bilim beretin mektep qabyrǵasynda qazaq tiliniń mereıin asqaqtatqan erekshe rýhanı shara - "Tilim meniń – ǵasyrlarǵa amanat" atty qalalyq semınar ótti.
Semınardyń negizgi maqsaty - tildiń qadir-qasıetin ulyqtap, uly Abaı murasy arqyly ulttyq qundylyq pen rýhanı bıiktikti dáripteý, sondaı-aq bilim berý úderisinde Abaı shyǵarmalaryn tıimdi paıdalaný joldaryn talqylaý boldy.
Mektep dırektory Aǵybaeva Saltanat Aqylbekqyzy óz sózinde ulttyq tildi ulyqtaý – urpaq tárbıesiniń basty ózegi ekenin atap ótti. Sondaı-aq, ol semınar qatysýshylaryna «Sıngapýr – bilim berý salasyndaǵy shabyt kózi» taqyrybynda baıandama jasady. Ol Sıngapýr eliniń bilim júıesindegi jańashyl ádister men tájirıbelerdi otandyq oqý úderisine engizýdiń tıimdi joldaryna toqtaldy.
"Bul sharada tek qana aýdan ishinde emes, jalpy qala ishindegi qazaq tili men ádebıeti páni muǵalimderiniń qoǵamdastyq jumysy kórsetilip otyr. Semınar barysynda jas mamandarǵa, №39 mektep-lıseıiniń, №44 mektep-gımnazıasynyń jáne №11 jalpy bilim beretin mekteptiń ustazdary ózderiniń is-tájirıbesin, sabaqta jasandy ıntellektti qoldaný ádisterin, sondaı-aq túrli pedagogıkalyq jańashyldyqtaryn bólisti", – dedi №11 jalpy bilim beretin mekteptiń dırektory Aǵybaeva Saltanat Aqylbekqyzy
Atalǵan is-sharamyzdyń qadirli qonaqtarynyń biri – qalalyq ádistemelik kabınetiniń ádiskeri Shakretova Qalamqas Bazarbaıqyzy beınejoldaý arqyly óz lebizin joldap, semınar qatysýshylaryna sáttilik pen shyǵarmashylyq shabyt tiledi.
Ustazdardyń tájirıbe almasý alańyna aınalǵan jıynǵa qalanyń ózge mektepterinen 30-dan astam muǵalim qatysty. Semınardyń qurmetti qonaǵy - Almaly aýdany №39 mektep-gımnazıasynyń qazaq tili men ádebıeti pániniń muǵalimi, Almaty qalasynyń «Jyl muǵalimi – 2021», «Úzdik pedagog – 2025», Halyqaralyq «Úzdik pedagog» ataǵynyń ıegeri Amanov Nurjigit Berdibekuly. Belgili ustaz óz sózinde Abaı shyǵarmalarynyń tárbıelik mánin ashyp, aqynnyń adamgershilik pen parasatqa úndegen ıdeıalarynyń búgingi urpaq sanasynda orny erekshe ekenin atap ótti. Sonymen qatar, qurmetti meıman "Kemeldengen tulǵa tárbıeleýde Abaı shyǵarmalarynyń mańyzyna" taqyrybynda qatysýshylarǵa mazmundy prezentasıa tanystyrdy.
Sonymen qatar, muǵalimder Abaıdyń óleńderin mánerlep oqyp, uly aqynnyń shyǵarmashylyǵyna arnalǵan ánnen shashý shashyp, bı kórinisterin sahnalady.
Al áriptesimiz Baızaqova Jannazıa Abaıdyń 180 jyldyǵyna arnaǵan arnaý oqydy. Kórinister men ónerpaz shákirtterdiń óneri sharanyń rýhanı mazmunyn tereńdete tústi.
Sharany uıymdastyrýǵa mekteptiń Qazaq tili men ádebıeti pániniń ádistemelik birlestigi uıytqy boldy.
Semınar barysynda ustazdar ózara tájirıbe almasyp, zamanaýı bilim berý ádisterin talqylady.
Sondaı-aq, is-sharaǵa № 39 fızıka-matematıkalyq lıseıden qazaq tili men ádebıeti páni muǵalimi Janar Kenjalıeva qatysty. Ol
"Oqý úderisin jetildirýdegi Abaıdyń "Tolyq adam" iliminiń mańyzdylyǵyna toqtaldy. Atalǵan mektepten qatysqan ınformatıka pániniń muǵalimi Gúlmıra Malybaeva áriptesterimen oı bólisti. Sıngapýrda taǵylymdamadan ótken muǵalim «Bilim berý salasyndaǵy halyqaralyq tájirıbe: qazaqstandyq mektepterge beıimdeý joldary» taqyrybynda tájirıbe almasty. Al 44 mektep-gımnazıadan Gúldana Qudaıbergenova, Nesibeldi Ardager, AıjanTalǵabekova esimdi ustazdar bul jıynda boı kórsetti.
Abaı murasy – adamgershilik pen danalyqtyń altyn arqaýy. Onyń shyǵarmalary – ustazǵa da, shákirtke de ónege, ult rýhanıatynyń shamshyraǵy.
Semınar sońynda qatysýshylar taǵylymdy oı túıip, til men rýhtyń tutastyǵyn sezindi. Uıymdastyrýshylar barlyq qatysýshylarǵa alǵys bildirip, osyndaı rýhanı baǵyttaǵy kezdesýlerdiń jalǵasyn tabatynyna senim bildirdi.
"Tilim meniń – ǵasyrlarǵa amanat" atty semınar – ulttyq rýh pen til mereıin asqaqtatqan taǵylymdy basqosý boldy.
