Qasıetti Ramazan aıy bıyl 23 naýryzda bastalady
Almaty qalasynda Bas múftı Naýryzbaı qajy Taǵanulynyń tóraǵalyǵymen QMDB janyndaǵy Sarapshylar keńesiniń IV májilisi ótti, dep habarlaıdy Almaty-akshamy.kz Almaty.tv-ge silteme jasap.
"Ózderińiz jaqsy bilesizder, jýyrda Memleket basshysy Qasym-Jomart Toqaev halqymyzdyń dúnıetanymyna saı dástúrli ıslamdy dáripteý asa mańyzdy ekenin, óskeleń urpaqtyń rýhanı tárbıesin nazardan tys qaldyrýǵa bolmaıtynyn erekshe atap ótti. Allaǵa shúkir, Qazaqstan musylmandary dinı basqarmasy dástúrli ıslamdy nasıhattaýda, jastardy izgilikke tárbıeleýde ónimdi eńbek etip keledi. Sizder de ortaq iske atsalysyp, belsendilik tanytyp kelesizder. Alla razy bolsyn! Endigi maqsat - jyl basynda josparlanǵan jumystarymyzdy júıeli túrde júzege asyrý", - dedi Bas múftı Naýryzbaı qajy Taǵanuly.
Májilis jumysynda QMDB-nyń rýhanı, dinı, ulttyq qundylyqtardy nasıhattaýdaǵy róli, QMDB-nyń 2023-2027 jyldarǵa arnalǵan strategıalyq damý baǵdarlamasy, Respýblıkalyq jáne jergilikti aqparattyq-nasıhat toby múshelerine arnalǵan qujattardyń jobalary talqylandy.
Eske salaıyq, Qasıetti Ramazan aıy bıyl 23 naýryzda bastalady. Aılardyń sultany sanalǵan 30 kúnde jamaǵat aýyz bekitip, oraza tutady. Al qasıetti Qadir túni sáýirdiń 17-nen 18-ne qaraǵan túnge túsip tur. 21 sáýir – Oraza aıttyń birinshi kúni.