2025 jyldyń 10 qyrkúıeginde Almaty qalasynyń aýmaqtyq saılaý komısıalary oqýshylardyń ózin-ózi basqarý saılaýyna úmitker bolǵysy keletinderge arnalǵan sheberlik sabaqtaryn ótkizdi, dep habarlaıdy Aqshamnews.kz tilshisi.
Sheberlik sabaqtary Almaty qalasy boıynsha Qazaqstan Respýblıkasy Konstıtýsıasynyń 30 jyldyǵyna arnalǵan is-sharalar josparyna sáıkes uıymdastyryldy. Sheberlik sabaqtaryna 9-11 synyptardyń oqýshylarynan quralǵan, mekteptegi ózin-ózi basqarý uıymyna múshe bolýǵa nıetti belsendi jastar qatysty.
Sharanyń basty maqsaty – jastardyń saılaý mádenıetin arttyrý, sondaı-aq ózin-ózi basqarý uıymynyń maqsaty men mindetterin tanystyrý. Almaty qalasyndaǵy mektep oqýshylarynyń ózin-ózi basqarý uıymy ártúrli pishimde 215 mektepte uıymdastyrylǵan.
Bul uıymnyń negizgi maqsaty - oqýshylarǵa óz múddelerin iske asyrýǵa jáne mektepti basqarýǵa qatysýǵa múmkindik berý, olardyń derbestigin, jaýapkershiligin, kóshbasshylyq qasıetteri men áleýmettik belsendiligin damytý bolyp tabylady. Barlyǵy 8 sheberlik sabaǵy ótkizildi, oǵan 346 adam qatysty. Ótkizilgen sheberlik sabaqtary jastar arasynda úlken qyzyǵýshylyq tanytty.
