Parlament Senatynyń Halyqaralyq qatynastar, qorǵanys jáne qaýipsizdik komıteti Radıoelektronıka jáne baılanys áskerı-ınjenerlik ınstıtýtynyń (REBÁII) bazasynda kóshpeli otyrys ótkizdi.
İs-sharaǵa Parlament Senatynyń depýtattary, Ulttyq qaýipsizdik komıtetiniń, Qorǵanys, Sıfrlyq damý, ınovasıalar jáne aeroǵarysh ónerkásibi mınıstrlikteriniń, Qazaqstan-Brıtan tehnıkalyq ýnıversıtetiniń ókilderi qatysty, dep habarlaıdy Almaty-akshamy.kz
Memlekettik qupıalardy qorǵaý jáne aqparattyq qaýipsizdik bólimsheleri úshin mamandardy daıarlaý jáne oqytý ádisteri boıynsha REBÁII bastyǵynyń orynbasary polkovnık Oırat Atykenov sóz sóıledi. Qarýly kúshter Bas shtaby Memlekettik qupıalardy qorǵaý departamentiniń bastyǵy polkovnık Tımýr Sádýaqasov kıberqaýipsizdik mamandaryn daıarlaýdy jetildirý jóninde usynystar aıtty.
Senat depýtaty Bıbigúl Jeksenbaı kıberqaýipsizdik – tek tehnologıa emes, ulttyq qaýipsizdik máselesi ekenin atap ótti.
«Qorǵaýdyń jańa tehnologıalary men ádisterin damytyp qana qoımaı, kıberkeńistiktegi qaýip-qaterlermen tıimdi kúresýge qabiletti mamandardyń kadrlyq rezervin saýatty qalyptastyrý da mańyzdy. Biz osy saladaǵy birqatar problemalyq aspektilerdi naqtylap, olardy depýtattyq saýal aıasynda jarıa etý oıymyzda bar», – dep depýtat josparlarymen bólisti.
Áskerı joǵary bilim ordalarynda depýtattar kıberpolıgondy aralap, oqý ornynyń kıberqaýipsizdik jóninde oqý-bilim berý baǵdarlamasymen tanysty. Olarǵa aqparatty qorǵaýdyń tıimdiligin baqylaýdyń zamanaýı quraldary men tehnıkalyq qorǵaý quraldary kórsetilip, kýrsanttardyń úzdik ǵylymı ázirlemeleri tanystyryldy. Senatorlar odan ózge ýnıversıtettiń murajaıyn, kazarmasyn, asqanasyn jáne basqa da áleýmettik-mádenı nysandaryn da aralady.
Senatorlar oqytý sapasyn arttyrý qajettigine toqtalyp, kásibı kıberqaýipsizdik mamandaryn daıarlaý arqyly Qarýly kúshterdi nyǵaıtýdyń mańyzdy ekenin atap ótti.