Bul sporttyq sharaǵa barlyǵy 7660 adam tirkelgen.
Almaty qalasynda jartylaı marafony ótip jatyr, dep habarlaıdy Almaty-akshamy.kz.
Alǵashqy kún shýaqtarymen Almatyda qalalyq jartylaı marafon bastaldy. Marafonshylardyń jarysqa qatysýshy úshin Tuńǵysh Prezıdent saıabaǵyna jınaldy. Tóreshilerdiń eskertýlerin tyńdap, jyldam jattyǵý jasaǵannan keıin jartylaı marafonǵa qatysýshylar júgirýdi bastap ketti. Birinshi marafonshylar leginde 10 km qashyqtyq jáne skandınavıalyq júrý boıynsha 4 myńnan astam jolǵa shyqty. Olar start syzyǵyn tańǵy 7:30-da kesip ótti. Odan keıin saǵat 08:10-da jartylaı marafonnyń basty dıstansıasy – 21 km qashyqtyqqa júgirý bastaldy.
Bul sporttyq sharaǵa barlyǵy 7660 adam tirkelgen. Olardyń qatarynda kásipqoı sportshylar men qarapaıym qala turǵyndary da bar. Sondaı-aq arnaıy osy marafon úshin álemniń 29 elinen jáne Qazaqstannyń 17 óńirinen týrıser men otandastyrymyz kelgen.
Aıta ketken jón, jartylaı marafonǵa qatysýshylardy jol boıy velosıpedpen júrgen kásibı tóreshiler baqylaıtyn bolady. Olar adamdardyń joldan shyǵyp ketpeýin, jarys erejeleriniń buzylmaýyn qadaǵalaıdy. Sondaı-aq barlyq adamdarmen birge jarys jolyna arnaıy Pacemaker-ler de shyqqan. Týyn ustaǵan sportshylar ózge adamdarǵa úlgi bolyp, jalpy júgiris rıtmin qurap otyrady. Sonymen qatar jarys dıstansıasynyń boıynda marafonshylardy qoldap, olarǵa as pen sý usynatyn volonterler bar.
Jartylaı marafon máresi Almatynyń Ortalyq stadıonda ornalasqan. Márege alǵashqy bolyp jetken júgirýshiler saǵat 12:00-de marapattalady. Sondaı-aq qalanyń bas stadıonynda cherlıderler komandalary men mýzykalyq toptardyń qatysýymen úlken oıyn-saýyq baǵdarlamasy uıymdastyrylǵan.
Eskerte keteıik, is-sharanyń ótkizilýine baılanysty 23 sáýirde saǵat 00:00-den 12:00-ge deıin qashyqtyqtan ótý oryndaryndaǵy joldarda qozǵalys ishinara jabyldy.