Álem birinshiligi 7-14 mamyr aralyǵynda ótedi.
Dzúdodan Qazaqstan erler jáne áıelder qurama komandalary Qatar astanasy Dohada ótetin álem chempıonatyna qatysady, dep habarlaıdy Almaty-akshamy.kz.
Qazaqstan dzúdo federasıasynyń baspasóz qyzmeti málim etkendeı, qazirgi tańda ulttyq qurama sportshylary álem chempıonaty aldyndaǵy qorytyndy oqý-jattyǵý jıynyna qatysyp jatyr. Qazaqstan erler quramasynyń bas bapkeri Nurbol Súleımenov sportshylardyń álem chempıonatyna qalaı iriktelgeni týraly aıtty.
«Álem chempıonaty – maýsymnyń eń mańyzdy jarystarynyń biri. Bizdiń mindetimiz osy jarysqa barynsha daıyndalyp, sportshylardy jaqsy formaǵa keltirý boldy. Álem birinshiligine sportshylar ár salmaq boıynsha osy maýsymdaǵy kórsetkishterine qaraı irikteldi. Qurama sportshylary jyl bastalǵannan beri birneshe Gran Prı, Grand Slam jarysyna qatysty jáne qurama sortshylary jyl basynan barlyq jarysta júldegerler qatarynan kórindi. Osyndaı nátıjege qaraı bapkerler quramy álem chempıonatyna qatysatyn quramany jasaqtady. Nátıjesinde, Doha tatamıinde el namysyn aǵa býyn ókilderi de, jas dzúdoshylar da qorǵaıtyn bolady.
Qazir Almaty oblysyndaǵy olımpıadalyq daıarlaý ortalyǵynda jattyǵýdyń sońǵy kezeńderin ótkizip jatyrmyz. Munda kúsh kórsetkishteri boıynsha, tehnıka men taktıka boıynsha kóp jumysty jetildiremiz. Álem chempıonaty jyldyń eń mańyzdy dodasy bolǵanymen, odan keıin bizdi Astanada ótetin Grand Slam jarysy kútip tur. Óz jerimizde ótetin álemdik básekede jaqsy nátıjege qol jetkizý úshin bizge álem chempıonatynan jaraqatsyz, abyroımen oralý asa mańyzdy», - deıdi Qazaqstan erler quramasynyń bas bapkeri Nurbol Súleımenov.
Dohada ótetin dzúdodan erler men áıelder arasyndaǵy álem chempıonatyna qatysatyn Qazaqstan quramasynyń tizimi kelesideı:
Erler: Eldos Smetov, Nurqanat Serikbaev (60 keli), Ǵusman Qyrǵyzbaev (66 keli), Jansaı Smaǵulov, Danıar Shamshaev (73 keli), Abylaıhan Jubanazar (81 keli), Dıdar Hamza, Aıdar Arapov (mix team, 90 keli), Nurlyhan Sharhan (100 keli), Ǵalymjan Qyryqbaı (100 keliden joǵary salmaq dárejesi).
Áıelder: Abıba Ábýjaqynova, Ǵalıa Tynbaeva (48 keli), Tolǵanaı Ábeýova (52 keli), Baqyt Qusaqbaeva (57 keli), Esmıgýl Kýıýlova (63 keli), Anastasıa Maıakova (70 keli), Arýna Jangeldına (78 keli), Kamıla Berliqash, Aqerke Ramazanova (78 keliden joǵary salmaq dárejesi).
Aıta keterligi, Dohada ótetin álem chempıonaty Parıj Olımpıadasy aldyndaǵy sońǵy álem birinshiligi bolyp sanalady. Jarys nátıjesi boıynsha sportshylardyń álem jáne Olımpıada reıtıńterine tıisti upaılar úlestiriledi. Atap aıtqanda, álem chempıony 2000, kúmis júldeger 1400, al qola júldeger 1000 upaıdan enshileıdi.