2025 jylǵy 23–24 qyrkúıek kúnderi Almaty qalasynda QR Oqý-aǵartý mınıstrliginiń tapsyrmasyna sáıkes Respýblıkalyq qosymsha bilim berý oqý-ádistemelik ortalyǵy uıymdastyrǵan «Boıaýlar qupıasy» respýblıkalyq jas sýretshiler baıqaýy ótti.
Bul baıqaýǵa elimizdiń barlyq oblystarynan, sondaı-aq Astana, Almaty jáne Shymkent qalalarynan 120-dan astam jas sýretshi qatysyp, ózderiniń shyǵarmashylyq qabiletterin tanytty.
Birinshi kún Almaty qalasyndaǵy Qarasaı aýdanynda ornalasqan «Órnek» lagerinde ótti. Qatysýshylar osy kúni konkýrs tapsyrmalaryn oryndap, shyǵarmashylyq jumystaryn ázirledi. Balalar sheberlik saǵattaryna qatysyp, bir-birimen tájirıbe almasyp, shyǵarmashylyq ortada erkin jumys isteý múmkindigine ıe boldy.
Ekinshi kún – 24 qyrkúıek – Almaty qalasy Oqýshylar saraıynda saltanatty túrde baıqaýdyń jabylý rásimi ótti. Kórme barysynda jas sýretshilerdiń úzdik jumystary jurtshylyq nazaryna usynyldy. Ádilqazylar alqasy qatysýshylardyń eńbekterin baǵalap, jeńimpazdardy anyqtady.
Baıqaý úsh nomınasıa boıynsha ótti
- «Qazaqstan boıaýlary: Meniń shańyraǵym – Qazaqstan Respýblıkasy»
- «Tiri ǵalamshar»
- «Beıbitshilik pen meıirimdilik bizdiń qolymyzda»
Jeńimpazdar dıplomdarmen jáne baǵaly syılyqtarmen marapattaldy. Barlyq qatysýshylarǵa arnaıy sertıfıkattar tabystaldy.
Jeńimpazdardy marapattaǵan Almaty qalasy Bilim basqarmasy basshysynyń orynbasary Bıbigúl Malǵajdarova óskeleń urpaqtyń boıynda patrıottyq sezimdi tárbıeleýde mańyzdy ról atqaratyn osyndaı is-sharalardy ótkizýdiń mańyzdylyǵyna toqtaldy. Ol eki kúnge sozylatyn jarystyń ótetin ornyn da atap ótti.
«Bul respýblıkalyq deńgeıdegi jarystyń Almatyda jáne elimizdegi eń jaqsy aýyldyq balalar lageriniń biri – «Órnek» mektep oqýshylary lagerinde ótkeni kóńilge qonymdy. Bul olardyń jańa oqý jylynda oqýyn nátıjeli jalǵastyrýyna múmkindik beredi», - deıdi Bıbigúl Malǵajdarova.
«Boıaýlar qupıasy» respýblıkalyq jas sýretshiler baıqaýy – balalardyń shyǵarmashylyq áleýetin damytýǵa, qıalyn erkin jetkizýge, patrıotızm men ulttyq qundylyqtardy qurmetteýge baǵyttalǵan biregeı joba. Baıqaý barysynda jasóspirimder ózderiniń ónerge degen súıispenshiligin kórsetip qana qoımaı, jańa dostar taýyp, shyǵarmashylyq baılanystaryn nyǵaıtty.