Alataý aýdanyndaǵy Oqýshylardyń ınovasıalyq shyǵarmashylyq ortalyǵynda Almaty qalasy Bilim basqarmasynyń alqa otyrysy ótti. Alqa otyrysy Bilim basqarmasynyń basshysy Saıran Saıfedenovtiń tóraǵalyǵymen uıymdastyryldy, dep habarlaıdy Aqshamnews.kz tilshisi.
Alqa jumysyna orta bilim berý uıymdarynyń, Qalalyq bilim berýdegi jańa tehnologıalardyń ǵylymı-ádistemelik ortalyǵy, Psıhologıalyq qoldaý ortalyǵy, Qalalyq dene shynyqtyrý jáne sport oqý-tájirıbelik ortalyǵynyń basshylary men mamandary qatysty.
Almaty qalasy Bilim basqarmasynyń orta bilim berý bóliminiń basshysy Aqmaral Aıtýarova bilim sapasy boıynsha qorytyndy eseppen tanystyrdy.
Pedagogterdiń biliktiligin arttyrý, kadrlardy daıarlaý boıynsha QBJTǴÁO dırektorynyń mindetin ýaqytsha atqarýshy Sandýǵash Ateıbek baıandama jasady.
Oqýshylardyń sporttaǵy negizgi jetistikterin Qalalyq dene shynyqtyrý jáne sport oqý-tájirıbelik ortalyǵynyń basshysy Bahtıar Elemesov usyndy.
Psıhologıalyq qoldaý ortalyǵynyń dırektory Venera Qoqanova kámeletke tolmaǵandarǵa qatysty býllıng, zorlyq-zombylyq, sýısıd, ózine-ózi zıan keltirýdiń aldyn alý boıynsha júrgizilgen jumystardyń qorytyndysyn tanystyrdy.
Alqa otyrysynda «Maqsatty mektepter» jobasy aıasynda Pedagogıkalyq sheberlik ortalyǵy men Shoqan Academy-de muǵalimderdi qaıta daıarlaý kýrstarynda pedagogterdiń biliktiligin arttyrý nátıjeleri aıtyldy.
Sondaı-aq, orta bilim berý uıymdarynda oryn tapshylyǵyn azaıtý men jaǵdaıdy jaqsartý baǵytynda oń ózgeristerdiń bar ekeni atap ótildi. Atap aıtqanda, qosymsha qurylys júrgizý, mektepterdi kúrdeli jóndeýden ótkizý belsendi túrde qolǵa alynǵan, jańa zamanaýı mektepterdi jańa oqý jylynda paıdalanýǵa berý josparlanýda.
Jylytý maýsymyna daıyndyqty ýaqtyly qamtamasyz etý maqsatynda Almaty qalasy Bilim basqarmasynyń basshysy mektep dırektorlaryna 20 tamyzǵa deıin daıyndyq aktilerin ótkizýdi tapsyrdy.
Alqa otyrysy barysynda Bilim basqarmasynyń basshysy bilim berý júıesin damytý jáne jańǵyrtý, ınovasıalyq tehnologıalardy engizý, ádistemelik qamtamasyz etýdi jetildirý jumystaryn jalǵastyrýdy tapsyrdy.
Saıran Saıfedenov oqýshylardyń úlgerimin arttyrýǵa únemi nazar aýdarý qajettigin atap ótti. Sonymen qatar, mektepti aıaqtaǵannan keıin de oqýshylarmen baılanysta bolyp, olardyń joǵary oqý oryndaryna túsýi men bolashaqta jumysqa ornalasýyna jaǵdaı jasaý mańyzdy ekenin aıtty.
Sondaı-aq, Almaty qalasy oqýshylarynyń jazǵy demalys kezeńindegi bos ýaqytyn tıimdi uıymdastyrý, ata-analar tarapynan baqylaýdy qamtamasyz etý, balalar men jasóspirimderdiń qaýipsizdigin qamtamasyz etý sharalary aıasynda monıtorıń júrgizýdi tapsyrdy.