Eske salsaq, qańtar aıynyń qazaly kúnderi terrorıster ishki ister departamentiniń ǵımaratyna 27 ret shabýyl jasaǵan.
Kýágerlerdiń aıtýynsha, ǵımarattyń tórt buryshynan tutqıyldap birneshe shabýyldar jasalǵan. Terrorıster sýyq qarýdan oq jaýdyryp, dybys shyǵaratyn granatalar, Molotov kokteılderin, sonymen qatar tas pen qurylys materıaldaryn qarý retinde qoldanǵan. Qazirgi ýaqytta shyǵyn men nysanǵa keltirilgen zaqym kólemi eseptelýde. İİD aldyn ala esebi boıynsha, 5 front-keńse zaqymdanǵan. Polısıa departamentiniń ǵımaraty, Almaly aýdandyq polısıa basqarmasyna da lańkester shyǵyn keltirgen. Sondaı-aq, 19 modýldi jáne 13 ekologıalyq polısıa beketi zardap shekken.
Máslıhat depýtattary polısıanyń avtoparkindegi jaǵdaımen de tanysty. Bassyzdyqtardyń kesiri men lańkestik shabýyldar nátıjesinde 165 qyzmettik kólik jaramsyz kúıge ushyraǵan. Onyń 53-i órtense, 64-i múlde qalpyna keltirýge jaramaıdy.
«Bizdiń komısıanyń músheleri men máslıhat depýtattary beıbit azamattardy qorǵaý maqsatynda jankeshtilik tanytyp, qaza bolǵan erjúrek batyrlardyń jaqyndaryna qaıǵyra kóńil aıtady. Biz úshin ár adamnyń ómiri qymbat, sol sebepti de beıbit jáne táýelsiz el bolyp damyp kele jatqan altyn shańyraǵymyz Qazaqstandy saqtaý óte mańyzdy. Quqyq buzýshylardyń keltirgen zalalyn baǵalaý jáne polıseılerdiń jumysyn úılestirip, talqylaý úshin Almaty polısıa departamentine arnaıy bardyq. Sońǵy oqıǵalarǵa baılanysty qalalyq bılik pen polısıa birigip qyraǵy bolady. Tonaý, qaraqshylyq shabýyldar, buzaqylyq jáne lańkestik áreketter sıaqty quqyq buzýshylyqtardyń aldyn alýǵa kóbirek kúsh salatyn bolady», - dep sanaıdy Almaty máslıhatynyń jergilikti memlekettik basqarý jáne qaýipsizdik máseleleri jónindegi turaqty komısıasynyń músheleri.
