Kúndelikti tańǵy saǵat 5-ten bastap júrgiziletin aralaý aıasynda Almaty ákiminiń orynbasary Almasqan Smatlaev birqatar nysandaǵy jumystardyń barysyn baqylap, jaýapty qurylymdarǵa naqty tapsyrmalar berdi.
Ákimniń orynbasary áýeli Bostandyq aýdanyndaǵy Ábish Kekilbaıuly kóshesinen Bokın kóshesine deıingi káriz jelilerin qaıta qurý jumystaryn kórdi. Munda ákimniń orynbasary qurylys alańyn kórip shyǵyp, materıaldardyń sapasy men ınjenerlik komýnıkasıalardyń jaı-kúıin naqtylady. Sonymen qatar merdigerge jumysty jedeldetýdi tapsyrdy.
Sosyn ol Jarokov jáne Dýnaevskıı kósheleriniń qıylysyndaǵy jylý jelilerin qaıta qurý ýchaskesin aralady. Ákimniń orynbasary bul jobanyń turǵyn úılerdi senimdi jylýmen qamtý úshin strategıalyq mańyzy bar ekenin atap, jumysty ýaqytyly oryndaýdy ári tehnologıalyq aqaýlarǵa jol bermeýdi qatań tapsyrdy.
A. Imanov atyndaǵy skverde (Mámetova kóshesi – Jeltoqsan kóshesiniń qıylysy) Almasqan Smatlaev sanıtarlyq maqsatta kesilip jatqan aǵashtardy kórip, jasyl jelekterdiń jaı-kúıin tekserdi. Ásirese, qaýipsizdik máselesine jáne kesilgen butaqtardy ýaqytyly shyǵarýǵa erekshe kóńil bólindi.
Almaly aýdanynda ol Ǵ. Músirepov atyndaǵy balalar men jasóspirimder teatry ǵımaraty janyndaǵy sýburqaqty kúrdeli jóndeý barysymen tanysty. Ákimniń orynbasary bul nysannyń qala turǵyndary men qonaqtary úshin mańyzdy demalys orny ekenin atap, ony qysqa merzimde ári sapaly túrde aıaqtaýdy mindettedi.
Sapar sońynda Dostyq dańǵyly boıyndaǵy abattandyrý men kógaldandyrý jumystary júrip jatqan aýmaqty aralady. Ákimniń orynbasary jaıaý júrginshiler aımaqtaryn aralap, tóselip jatqan jabynnyń sapasyn, ınjenerlik sheshimderdiń durystyǵyn tekserdi.
Sapar sońynda Almasqan Smatlaev barlyq jumysty belgilengen merzimde aıaqtap, qaýipsizdik pen kórkeıtý jumystaryna mán berýdi tapsyrdy. Qaladaǵy ózgerister halyqtyń kúndelikti turmysynan anyq baıqalýǵa tıis ekenin atady.