İİM "Qaırat" - "Real" machindegi alypsatarlar daýyna qatysty túsinikteme berdi, - dep habarlaıdy Aqshamnews.kz. tilshisi Tengri Life-qa siltep.
Almatyda 30 qyrkúıekte ótken fýtboldan ÝEFA Chempıondar lıgasynyń "Qaırat" pen madrıdtik "Real" arasyndaǵy oıynynan keıin áleýmettik jelilerde qyzý talqylaý órbidi. Jeli qoldanýshylary tanymal qazaqstandyq ánshiler Nurlan Espanov pen Sáken Maıǵazıevtiń uldaryn bılet spekýlásıasyna qatysy bar dep aıyptady.
Jelide taraǵan habarlamalarǵa sáıkes, Nurlan Espanovtyń uly mach bıletterin 500-600 myń teńgeden satqan-mys. Keıin Sáken Maıǵazıevtiń uly da osyndaı habarlandyrý jarıalap, bıletterdi 350 myń teńgeden usynǵany jaıly aqparat shyqty.
Bul jaıt qoǵamda rezonans týdyryp, bıletterdiń qoljetimdiligi men adal satylymyna qatysty suraqtar kóbeıdi.
İİM: tekserý úshin resmı shaǵym qajet
Májilis kýlýarynda jýrnalıser ishki ister mınıstriniń orynbasary Sanjar Ádilovtan osy máselege baılanysty túsinikteme surady.
"Men bul aqparatty sizderden estip turmyn. Eger resmı ótinish tússe, biz mindetti túrde tekserý júrgizemiz. Qajetti prosesýaldyq sheshim qabyldanady", - dedi Ádilov.
Ol sonymen birge áleýmettik jelilerdegi shaǵymdardy kórmegenin, biraq azamattardan resmı túrde ótinish túsken jaǵdaıda quqyq qorǵaý organdary "mindetti túrde tekserý sharalaryn júrgizýge daıyn" ekenin aıtty.