Almaty qalasy polısıa departamentiniń jańa basshysy taǵaıyndaldy. Bul qyzmetke buǵan deıin Soltústik Qazaqstan oblysy polısıa departamentin basqarǵan Aıdyn Qabduldınov keldi, dep habarlaıdy Aqshamnews.kz tilshisi.
Atalǵan aqparatty QR İshki ister mınıstrliginiń baspasóz qyzmeti rastady.
"Buǵan deıin Soltústik Qazaqstan oblysy polısıa departamentiniń bastyǵy qyzmetin atqarǵan polısıa general-maıory Aıdyn Toqtaruly Qabduldınov Almaty qalasy polısıa departamentiniń bastyǵy bolyp taǵaıyndaldy", – delingen mınıstrlik habarlamasynda.
Buǵan deıin Almaty qalalyq polısıa departamentin Arystanǵanı Zapparov basqarǵan.
Aıdyn Qabduldınov – polısıa general-maıory. İshki ister organdaryndaǵy qyzmetin Óskemen qalalyq İİB-da tergeýshi retinde bastaǵan. 2000 jyldan bastap Almaty qalasynyń ishki ister bólimshelerinde qyzmet atqarǵan.
2004 jyldan beri Almaty qalalyq İİD-nyń ishki qaýipsizdik basqarmasynda ár jyldary tergeýshi, jedel ýákil jáne bólim basshysy laýazymdaryn atqarǵan. 2012 jyly – ishki qaýipsizdik basqarmasy bastyǵynyń orynbasary, 2017 jyldan bastap osy bólimsheniń basshysy bolǵan. Sondaı-aq Batys Qazaqstan oblysy PD-nyń ishki qaýipsizdik basqarmasyn basqarǵan.
2020 jylǵy 23 sáýirde Almaty qalasy polısıa departamenti bastyǵynyń orynbasary bolyp taǵaıyndalsa, 2022 jyldyń qańtar aıynyń sońynan búginge deıin SQO polısıa departamentin basqarǵan.