Almaty qalalyq polısıa departamentiniń bastyǵy Arystanǵanı Zapparov ál-Farabı atyndaǵy Qazaq ulttyq ýnıversıtetiniń zań fakúltetiniń stýdentterimen kezdesti.
Qalanyń bas polıseıi jınalys ótkizip, polısıa qyzmeti týraly aıtyp berdi. Sonymen qatar jınalǵandardy qaladaǵy esirtki qylmysymen kúres jáne jol qaýipsizdigi týraly aqparattandyrdy, dep habarlaıdy Almaty-akshamy.kz Polisia.kz-ke silteme jasap.
«Shynynda, men úshin bir kezderi ózim oqyǵan ýnıversıtette sóz sóıleý úlken mártebe. Zań fakúltetinde oqyp júrip, barlyqtaryńyz bolashaq mamandyqtaryńyzdy tańdap, kim bolǵylaryńyz keletinin bilesizder dep oılaımyn. Mamandyqty durys tańdaý – ómirden óz ornyńdy durys tabý degen sóz. Memleket basshysy Qasym-Jomart Toqaev Jańa Qazaqstan jastary úshin úsh mańyzdy basymdyqty atap ótti: bilimge umtylý, eńbekqorlyq jáne patrıottyq. Búgin sizder birneshe tilde erkin sóıleısizder jáne ózderińizge úlken jáne ambısıalyq josparlar qoıasyzdar. Jastardyń qatysýymen elimiz, azamattardyń ál-aýqaty men ómir súrý sapasyn arttyrýdy qamtamasyz ete otyryp, básekege qabiletti bolý kerek. Otanyna qajetti jáne paıdaly bolý árbir jastyń maqsaty bolýy kerek», – dedi Arystanǵanı Zapparov.
Sonymen qatar PD-nyń bastyǵy polısıa qyzmetiniń artyqshylyqtaryna toqtaldy. Polısıa departamentiniń negizgi mindetteri profılaktıka, ıaǵnı quqyq buzýshylyqtyń aldyn alý bolyp sanalady. Al eger olar buryn jasalǵan bolsa, olardy ashý jáne tergeý, uıymdasqan qylmyspen kúresý, esirtki qylmysyna, ekstremızmge qarsy turý, sondaı-aq jol qaýipsizdigin jáne kóshi-qondy baqylaýdy qamtamasyz etý ekendigin aıtty.
«Polısıa qyzmeti zańdylyq pen tártipti saqtaýǵa, azamattarymyzdyń quqyqtary men bostandyqtaryn qorǵaýǵa tikeleı baılanysty. Demek, polısıadaǵy qyzmet te qaýipsizdikti qamtamasyz etý arqyly elimizdiń damýyna qosylǵan orasan zor úles bolyp sanalady. Polısıa qyzmetkeri mamandyǵy – qaýip-qaterden qoryqpaıtyn jáne azamattarymyzdyń qaýipsizdigine úles qosýǵa daıyn adamdar úshin jaqsy tańdaý. Osy baǵytty tańdaý arqyly sizder taptyrmas myqty maman atanyp, Qazaqstannyń bolashaǵyna áser ete alasyzdar, sońǵy kezde memleket tarapynan polısıaǵa áleýmettik qoldaý aıtarlyqtaı artty», – dedi Arystanǵanı Zapparov.
PD bastyǵynyń aıtýynsha, qoǵamdyq tártip pen azamattardyń qaýipsizdigi polısıanyń kásibı jumysyna ǵana emes, búkil halyqtyń belsendi ustanymyna baılanysty. Osyǵan oraı, ol bolashaq zańgerlerdi óz ortasyndaǵy qylmystyń aldyn alý jolynda úles qosýǵa shaqyrdy.