Almaty qalalyq PD-nyń basshysy Arystanǵanı Zapparov PIK jáne OSI tóraǵalarymen ótken dástúrli kezdesýde kóshelerdi jaryqtandyrý máselesine erekshe nazar aýdardy.
Bul joly ol qalanyń Jetisý aýdanynda ótti. Munda jergilikti halyqtyń quqyqtyq tártip isine belsene aralasatyndyǵy atap ótildi, dep habarlaıdy Almaty-akshamy.kz Polisia.kz-ke silteme jasap.
« Almaty qalasynyń polısıasy halyqqa árqashan ashyq jáne olarǵa kómek kórsetýge daıyn ekenin bilesizder. Qoǵamdyq tártipti saqtaý bizben yntalandyrylady. Máselen, qazirgi tańda Jetisý aýdanynyń 50-den astam turǵyny polısıa qyzmetkerlerine qoǵamdyq qaýipsizdikti qamtamasyz etýde jan-jaqty kómek kórsetip, reıdtik is-sharalarǵa jáne iz-túzsiz joǵalǵandardy izdeýge belsene qatysýda. Bizdiń ózara is-qımylymyz qaladaǵy qylmystyń aldyn alýǵa oń áserin tıgizetinine shyn júrekten senemin. Sizdiń árbir habarlamańyzǵa, áriptesterim múmkindiginshe tezirek sharalar qabyldaıtynyna ýáde beremin», – dedi Zapparov.
Spıkerdiń aıtýynsha, azamattardyń qaýipsizdigi qala kósheleriniń qanshalyqty jaryqtandyrylǵanyna jáne beınebaqylaýdyń qanshalyqty jaqsy ornatylǵanyna tikeleı baılanysty.
«Júrgizilip jatqan jumystarǵa qaramastan, kóshelerdiń jaryqtanbaǵan bólikteri bar. Sondaı-aq, qaraýsyz qalǵan ǵımarattar men qurylys alańdary da bar. Qylmystardyń qaı jerde jasalatynyn túsiný úshin tereń taldaý qajet emes. Qylmys qarańǵy jerde, beınekameralar joq jerde jasalady. Mundaı jerlerde, ádette, kúdikti adamdar jınalady. Kóbinese esirtkini qoldaný úshin. Taǵy bir jaıt, aqparattyq tehnologıanyń damýy aıasynda esirtki jáne psıhotroptyq zattardy satyp alýdyń qoljetimdi bolýy. Sondyqtan kún saıyn jastarymyzdy qurtyp jatqan bul dertpen kúresýge barynsha kóp adam kúsh salǵany abzal», – dedi Arystanǵanı Zapparov.