Almatylyq zeınetker ınternet-alaıaqtardyń qurbanyna aınalǵanymen, tártip saqshylarynyń jedel ári kásibı áreketiniń nátıjesinde onyń joǵaltqan qarajaty qaıtaryldy.
Bul týraly qala turǵyny Almaty qalalyq polısıa departamentiniń basshylyǵyna joldaǵan alǵys hatynda jazǵan, dep habarlaıdy aqshamnews.kz Polisia.kz-ke silteme jasap.
Zeınetkerdiń aıtýynsha, ózin "Qazposhta" qyzmetkeri retinde tanystyrǵan belgisiz bireýler ony aldap, SMS-kodyn qolǵa túsirip, atyna nesıe rásimdegen. Oqıǵanyń mán-jaıyn túsingennen keıin ol birden Áýezov aýdandyq polısıa basqarmasyna júgingen.
- Aǵa tergeýshi Muqan Qonysbaevtyń saýatty nusqaýlyǵy men áriptesteriniń kásibı jáne úılesimdi jumysynyń arqasynda istiń oń sheshilýine qol jetkizildi. Alaıaqtardyń biri ustalyp, keltirilgen materıaldyq shyǵyn tolyq óteldi. Qazirgi ýaqytta qylmystyq is tergelip jatyr. Osyndaı qıyn jaǵdaıda jan-jaqty qoldaý kórsetken, qamqorlyq tanytqan jáne baǵa jetpes kómek bergen polısıa qyzmetkerlerine shynaıy alǵysymdy bildiremin. Olarǵa qajymas qaırat, zor densaýlyq jáne qyzmette tolaǵaı tabys tileımin, – dep jazdy ol óz hatynda.