Alataý aýdanynda polıseıler qalta urlyǵynyń aldyn alý boıynsha profılaktıkalyq jumystardy qarqyndy júrgizip jatyr, dep habarlaıdy aqshamnews.kz
Adamdar kóp jınalatyn oryndarda, ásirese qoǵamdyq kólikterde, azamattardyń urlyqtan saqtaný joldaryn túsindiretin jadynamalar men broshúralar ornalastyryldy. Jańa oqý jylynyń bastalýyna baılanysty qalada jolaýshylar aǵyny aıtarlyqtaı kóbeıedi. Mektep oqýshylary men stýdentterdiń sabaqqa oralýy, sondaı-aq qala turǵyndarynyń belsendiligi artatyn kezeńde tártip saqshylaryna júkteletin jaýapkershilik te eselenedi.
— Qala turǵyndary men qonaqtaryn qoǵamdyq oryndar men kólikte barynsha muqıat bolýǵa shaqyramyz. Sómke men rúkzaktaryńyzdy árdaıym kóz aldyńyzda ustańyz, ashyq qaltalarda qomaqty aqsha men baǵaly zattardy saqtamańyz. Eger kúdikti adamdardy baıqasańyz nemese urlyqtyń kýási bolsańyz, dereý polısıaǵa habarlasyńyz. Qarapaıym saqtyq sharalary múlkińiz ben tynyshtyǵyńyzdy saqtaýǵa kómektesedi, — dedi Alataý aýdandyq polısıa basqarmasy bastyǵynyń orynbasary Áset Kópeshbaev.