40 jastaǵy J. esimdi azamat asa iri kólemde sıntetıkalyq esirtkini zańsyz satýmen jáne saqtaýmen aınalysqan.
Almaty polısıasy “sıntetıkanyń” iri partıasyn tárkiledi, – dep habarlaıdy Almaty-akshamy.kz Polisia.kz-ke silteme jasap.
Almaty qalasy Túrksib aýdanynyń 40 jastaǵy turǵyny sıntetıkalyq esirtkini daıyndaý jáne taratý boıynsha qylmystyq áreketpen aınalysqan. Ol Almaty qalasy prokýratýrasynyń úılestirýimen “Qarasora – 2023” is-sharasy aıasynda júrgizilgen arnaıy operasıa nátıjesinde ustaldy.
Atalǵan derek QR QK-niń 297-baby 1-bóligi (Esirtki, psıhotroptyq zattardy, sol tektesterdi ótkizý maqsatynda zańsyz daıyndaý, qaıta óńdeý, ıemdený, saqtaý, tasymaldaý, jóneltý ne ótkizý) boıynsha sotqa deıingi tergeýdiń biryńǵaı tizilimine tirkeldi. Sot sanksıasymen kúdiktiniń úıin tintý kezinde untaq túrindegi sur tústi zat jáne erekshe ıisi bar túıirshikter salynǵan 2 polıetılen baılamy, sondaı-aq elektrondy tarazylar, oraýysh baılamdar, suıyqtyǵy bar quty tabylyp, tárkilendi.
«Sot-hımıalyq saraptamasynyń qorytyndysy boıynsha, jalpy salmaǵy 5 keliden asatyn Álfa-pvp esirtki zaty tabyldy. Aıta ketý kerek, bul sıntetıkalyq preparat mefedronnan birneshe ese zıandy. Esirtki satýshy ýaqytsha ustaý ızolátoryna qamaldy. Qalaǵa óndiriske qajetti shıkizatpen qamtamasyz etetin arna anyqtalýda», – dedi Almaty qalalyq PD esirtki qylmysyna qarsy kúres basqarmasynyń bastyǵy Erlan Álmaǵambetov.
QR QPK-niń 201-babyna sáıkes ózge aqparattar tergeý múddesine oraı jarıalaýǵa jatpaıdy. QR Konstıtýsıasynyń 77-babynyń 3-tarmaǵynyń 1-tarmaqshasyna jáne QR QPK-niń 19-baby 1-bóligine sáıkes, zańdy kúshine engen sot úkimimen belgilengenge deıin árbir adam qylmystyq quqyq buzýshylyq jasaýda kinásiz dep tanylady.