Almaty polısıasy “ınvestısıalyq” alaıaqtardyń belsendiligi artqanyn eskertedi, - dep habarlaıdy aqshamnews.kz.
Almaty polısıasy Kıberpoly ınternet-alaıaqtyqtyń eń tanymal túrleri týraly eskertti.
– Aqparattyq resýrstarda jáne áleýmettik jelilerde aqshany tabysty bızneske kepildendirilgen ınvestısıalaý, sondaı-aq aı saıynǵy dıvıdendter men bonýstary týraly habarlandyrýlar ornalastyrylady. Ádette, alaıaqtar sheteldik nemese qazaqstandyq bank kartalaryna, sondaı-aq elektrondy ámıandar men basqa da tólem júıeleri arqyly aqsha aýdarýdy suraıdy. Adamdardyń senimine kirý jáne basqa da qurbandardy tartý úshin olar bastapqy kezeńde az mólsherde aqsha tóleıdi. Ádette, alǵashqy tólemder alaıaqtyqtyń jańa qurbandarynyń salǵan qarajatynan jasalady. Qomaqty somma jınaǵan soń, alaıaq tólem jasaýdy toqtatady, – deıdi Almaty qalalyq PD kıberqylmysqa qarsy kúres basqarmasynyń bastyǵy Anes Qaldybaev.
Polısıa azamattardy qyraǵylyqqa, saq bolýǵa jáne ańǵal bolmaýǵa shaqyrdy.