1 qyrkúıek kúni, sondaı-aq, oqý jylynyń alǵashqy aptalarynda da polısıa qyzmetkerleri kúsheıtilgen rejımde qyzmet etedi.
Tártip bilim berý mekemeleri mańyndaǵy jaıaý júrginshiler ótkelderinde kezekshilik atqaryp, qozǵalysqa qatysýshylarmen, jaıaý júrginshilermen — ata-analarmen jáne balalarmen, sondaı-aq júrgizýshilermen jumys isteıtin bolady. Polısıa qyzmetkerleri joldarda muqıat bolý kerektigin eske salady. Bul týraly ÓKQ brıfıńinde Almaty polısıa departamentiniń resmı ókili Saltanat Ázirbek málimdedi, dep habarlaıdy Almaty-akshamy.kz.
«Oqý jylynyń bastapqy kezeńinde jol qozǵalysy qaýipsizdiginiń deńgeıin arttyrý úshin mektep okrýgterinde patrúldik polısıa ekıpajdary, ıývenaldy polıseıler kezekshilik etetin bolady. Búgingi tańda mektepterdiń janyndaǵy jol belgilerin aýystyrý, jasandy tómpeshikterdi ornatý jumystary júrgizildi. Barlyǵy 62 jasandy tómpeshik ornatyldy», - dedi Saltanat Ázirbek.
Sonymen qatar, «Abaılańyz, balalar» jedel aldyn alý sharasyna daıyndyq kezinde jalpy bilim beretin, mektepke deıingi bilim berý mekemeler aýmaǵynda 47 jańa jol belgileri ornatyldy, 43 jol belgi qalpyna keltirildi, 10500 sharshy metr aýmaqqa joldy belgileý syzyqtary salyndy jáne t.b.
Polıseılerdiń basty mindetteriniń biri - jol qaýipsizdigin qamtamasyz etý. Osyǵan baılanysty polısıa departamentiniń qyzmetkerleri qala turǵyndaryn jol qozǵalysy erejelerin qatań saqtaýǵa shaqyrady. Saltanat Ázirbek eresek turǵyndarǵa jol erejelerin saqtaýǵa, jol júrý bóligin belgilenbegen jerlerden ótpeýge shaqyrdy.
«Qoǵamnyń árbir múshesiniń jol qozǵalysy erejelerin múltiksiz saqtaýy óte mańyzdy. Qurmetti eresekter, balalaryńyzǵa durys úlgi kórsetińizder. Áıtpese, olar bul áreketti siz bolmaǵan kezde qaıtalaıdy», - deıdi Saltanat Ázirbek.
ÓKQ alańynda brıfıńke qatysqan spıker statısıkany keltirdi. Jergilikti polısıa qyzmeti basqarmasynyń málimetinshe, aǵymdaǵy jyldyń 7 aıynda Almatyda balalardyń qatysýymen 381 jol-kólik oqıǵasy oryn alyp, 384 bala jaraqat alyp, 5 bala qaıtys boldy.
Jýrnalıserdiń suraqtaryna jaýap bere otyryp, PD ókili qalada apattyq oryndarǵa taldaý júrgizilgenin, bul aýdandar boıynsha apat jıi bolatyn ýchaskelerdi anyqtaýǵa múmkindik bergenin aıtty:
Alataý aýdany - Raıymbek dańǵyly, Rysqulov kóshesi, Soltústik aınalma kóshesi.
Almaly aýdany - Tóle bı dańǵyly, Seıfýllın dańǵyly, Baıtursynov kóshesi.
Áýezov aýdany – Abaı dańǵyly, Altynsarın kóshesi, Raıymbek dańǵyly
Bostandyq aýdany - Ál-Farabı dańǵyly, Jandosov kóshesi, Jarokov kóshesi.
Jetisý aýdany - Angarskaıa kóshesi, Soltústik aınalma kóshesi, Jansúgirov kóshesi.
Medeý aýdany – Dostyq dańǵyly, Qulja trakti, Halıýllına kóshesi
Naýryzbaı aýdany – Júnisov kóshesi, Raıymbek trakti, Áshimov kóshesi
Túrksib aýdany - Súıinbaı dańǵyly, Sholohov kóshesi, Maılın kóshesi.
«Bilim berý mekemeleri aýmaǵynda kólik jyldamdyǵyn baqylaý úshin «Sergek» AÓK-niń 12 beketi jumys isteıdi. Sonymen qatar, 2023 jyly «Sergek» AÓK-niń 97 postyn ornatý josparlanýda», - dep qorytyndylady Saltanat Ázirbek.