Almaty qalasy Jetisý aýdanynyń polısıa qyzmetkerleri qala dúkenderinde jasalǵan eki urlyqtyń betin ashty.
Birinshi jaǵdaıda qaskóı sport dúkeninen krosovkalardy urlap ketken. Taǵy birinde – jeńil aqshaǵa qumar adam 45 myń teńgeniń tutyný taýarlaryn qoldy qylǵan. Eki qylmys ta beınebaqylaý kameralaryna jazylyp qalǵan, dep habarlaıdy Almaty-akshamy.kz
«Jedel-izdestirý is-sharalarynyń nátıjesinde atalǵan qylmysty jasady degen kúdikpen 1969 jyly týǵan S.esimdi azamat jáne 1986 jylǵy K.esimdi azamat ustaldy. Eki aıyptalýshyǵa qatysty QR QK-niń 188-baby 1-bóligi boıynsha qylmystyq ister tergelip jatyr. Ustalǵandardyń jeke basy basqa da yqtımal epızodtarǵa qatysy bar-joǵyna tekserilýde», – dedi Jetisý aýdandyq polısıa basqarmasynyń bastyǵy Jánibek Shynasylov.
QR QK-niń 201-babyna sáıkes ózge aqparat tergeý múddesine oraı jarıa etilmeıdi. QR Konstıtýsıasynyń 77-baby 3-bólimi 1-tarmaǵy, QR QK-niń 19-baby 1-tarmaǵyna saı kez kelgen azamat sot sheshimi zańdy kúshine engenge deıin kinásiz dep sanalady.