Oqý jylynyń aıaqtalýy men mektep bitirý keshteri qarsańynda Almatynyń polısıa qyzmetkerleri men kólik jalǵa beretin kompanıalardyń ókilderi balalardyń qaýipsizdigin talqylady.
Esterińizge sala keteıik, balalardyń jol-kólik jaraqatynyń aldyn alý, sondaı-aq kósheler men joldardaǵy qaýipsiz júris-turys daǵdylaryn bekitý, balalar men jasóspirimderdi turaqty turatyn jerleri jáne oqý oryndaryndaǵy kóliktik ortaǵa beıimdeý maqsatynda jazǵy demalys barysynda 20-30 mamyr aralyǵynda “Nazar aýdaryńyz, balalar!” jedel aldyn alý is-sharasy ótkizilip jatyr, dep habarlaıdy Almaty-akshamy.kz.
"Kún tártibinde mektep bitirý rásimi qarsańynda balalardyń qaýipsizdigin qamtamasyz etý ózekti másele bolyp otyr. Ótken jyldardaǵy tájirıbege súıene otyryp, biz aldyn ala jumys keńesine bastamashylyq jasap, oǵan qatysýshylardy kámeletke tolmaǵandarǵa kólik berýge tyıym salý týraly habardar ettik. Sonymen qatar lımýzın jáne basqa da jalǵa beriletin kólik júrgizýshileriniń nazaryn jol qozǵalysy erejelerin buzbaýǵa aýdardyq. Ádette, jasóspirimder terezeden, lúkterden basyn shyǵarady, kartejder uıymdastyrady. Kezdesý, jalpy alǵanda, syndarly dıalog túrinde ótti", – dedi Almaty qalalyq PD jergilikti polısıa qyzmeti basqarmasynyń basshysy Serik Shýmaev.