Negizgi maqsat – azamattardy koronavırýs ınfeksıasynan qorǵaý.
Musylmandardyń basty merekesi -Qurban aıt 2021 jyly 20 men 22 shilde aralyǵynda ótedi. Al merekeniń formaty ótken jyldyń úlgisinde bolady. Qurbandyq shalý rásimi qurban2021.kz. saıtta ótinim bere otyryp, onlaın-rejımde ótedi, dep habarlady Almaty-akshamy.kz.
Almaty ortalyq meshitiniń naıb ımamy Madıar Pirimqulovtyń aıtýynsha, KVI-diń kúrdeli epıdemıologıalyq jaǵdaıyna baılanysty musylmandar jınalysy bolmaıdy. Janýarlardy qurbandyqqa shalýdyń barlyq salttyq áreketteri qashyqtan onlaın rejımde ótedi.
Nıet bildirýshiler qurban2021.kz saıtynda 22 shilde saǵat 14.00-ge deıin qurbandyq shalýǵa ótinish bere alady. Qurbandyq eti muqtaj otbasylarǵa jetkiziledi. Sondaı-aq onyń etin alǵysy keletinder de osy saıtta ótinish qaldyra alady.
17 shilde kúni ınternet-platforma qyzmetine et alýǵa nıet bildirýshilerden 486 ótinim berildi. Al 200-den astam almatylyq qurban shalý rásimin jasaýǵa sheshim qabyldady.
Almaty ortalyq meshitiniń naıb ımamy qurbandyq shalýdyń barysy duǵa kezinde rásimge tapsyrys bergenderdiń esimderi aıtylatyndaı beınejazba rejıminde ótetinin aıtty. Beınejazbadan keıin tapsyrys berýshige jiberiledi.
«Internettegi qurbandyq tek belgilengen jerde bolady. Rásimdi ótkizýge arnaıy top bekitilgen, bógde adamdarǵa kirýge tyıym salynǵan, barlyq jumys sanıtarlyq talaptarǵa sáıkes júrgiziletin bolady», – deıdi Madıar Pirimqulov.
Onlaın-rejımde qurbandyq shalý dástúrin ótkizý jáne muqtaj adamdarǵa tolyq taratý tájirıbesi Túrkıada, Malaızıada, Indonezıada, Birikken Arab Ámirlikterinde áldeqashan engizilip, jyl saıynǵy dástúrge aınaldy. Negizgi maqsat – azamattardy koronavırýs ınfeksıasynan qorǵaý.
Din ókilderi dindarlardy Qurban aıt merekesine jaýapkershilikpen qaraýǵa shaqyrdy. Bul kúnderi úıde bolý kerek, qonaqqa barmaý kerek jáne is-shara uıymdastyrmaý kerek. Osy qıyn ýaqytta qala turǵyndary kishipeıildilik tanytyp, ınfeksıanyń taralýyn toqtatý úshin bárin jasaýy kerek.
Qurban aıtqa qatysty barlyq suraqtar boıynsha myna nómirlerge habarlasýǵa bolady: 8 (727) 329 09 66, 8 778 382 88 36 nemese WhatsApp nómiri boıynsha – 8 775 475 00 83.