Seısmıkalyq monıtorıń jelisin keńeıtý mańyzdy
Almaty qalasy búkil Ortalyq Azıadaǵy seısmıkalyq qaýipti aımaqtardyń birinde ornalasqan. Bul týraly TJ mınıstri Iýrıı Ilın vedomstvoaralyq memlekettik komısıanyń kezekten tys otyrysynda aıtty, dep habarlaıdy Almaty-akshamy.kz QazAqparatqa silteme jasap.
«Seısmıkalyq qaýipsizdiktiń memlekettik júıesin jetildirý - halyqty qorǵaýdyń mańyzdy baǵyttarynyń biri jáne Memleket basshysynyń erekshe baqylaýynda. Almaty, Shymkent qalalarynyń, sondaı-aq Abaı, Jetisý, Almaty, Shyǵys Qazaqstan, Jambyl, Qyzylorda, Túrkistan oblystarynyń aýmaqtary seısmıkalyq qaýipsizdiktiń joǵary áleýetine kiredi. Bul rette Almaty qalasy búkil Ortalyq Azıadaǵy seısmıkalyq qaýipti aımaqtardyń birinde ornalasqan», - dedi mınıstr.
Sonymen qatar, Iýrıı Ilın Úkimet basshysynyń múddeli ortalyq memlekettik jáne jergilikti atqarýshy organdardyń aldyna seısmıkalyq qaýipsizdik jáne qurylys salasyndaǵy normatıvterdiń talaptaryn oryndamaǵany úshin jaýapkershilikti qatańdatý bóliginde zańnamaǵa ózgerister engizý, laýazymdy tulǵalardyń olardy iske asyrǵany úshin baqylaýy men jaýapkershiligin arttyra otyryp, seısmıka boıynsha jol kartasynyń is-sharalaryna tekserý júrgizý, jańa ádisnama boıynsha oblystar men iri qalalardyń seısmıkalyq aýdandastyrý kartalaryn ázirleý jáne, seısmıkalyq monıtorıń jelisin keńeıtý, jer silkinisin boljaý ádisterin jetildirý jáne barlyq eldi mekenderdiń seısmıkalyq qaýip-qaterin baǵalaýdy júrgizý mindetterin qoıdy.
Qurylys kezinde seısmıkalyq qaýipsizdikti qamtamasyz etý boıynsha qabyldanyp jatqan sharalar týraly IIDM Qurylys jáne TKSH isteri komıteti tóraǵasynyń orynbasary Baqytjan Júnisbekov aıtyp berdi.
Osy máseleni tyńdaǵan kezde mınıstr seısmıkalyq qaýipti óńirlerde qurylys kezinde barlyq normalar men erejelerdi saqtaý qajettigine erekshe nazar aýdardy, bul jer silkinisi bolǵan jaǵdaıda qıratýdy barynsha azaıtýǵa jáne tıisinshe zardap shekken azamattarǵa yqpal etetin bolady. Iýrıı Ilın beıindi komıtetke, ásirese, jeke sektordaǵy qurylys pen normalardyń saqtalýyna nazar aýdarýdy usyndy.
Seısmıkalyq qaýipti óńirlerdegi obektilerdi esepke alý jáne pasporttaý, osy baǵyttaǵy baqylaý boıynsha júrgizilip jatqan jumystar týraly aqparatty birqatar basqa óńirlerdiń beıindi uıymdary men mınıstrlikterdiń ókilderi jetkizdi.
Sonymen qatar, elimizdegi aǵymdaǵy seısmıkalyq jaǵdaı týraly «Seısmologıa ınstıtýty» JSHS dırektory Dáýlet Sársenbaev, sondaı-aq qazaqstandyq qutqarýshylardyń Túrkıadaǵy joıqyn jer silkinisiniń saldaryn joıýǵa qatysý tájirıbesi týraly TJ joıý departamentiniń bastyǵy Kaharman Orazalın baıandady.
Qarjy mınıstrligi Quqyq qorǵaý, arnaıy organdar jáne qorǵanys búdjeti departamenti dırektorynyń orynbasary Dúısen Ádilhanov elimizdiń seısmıkalyq qaýipsizdigin qamtamasyz etýge bólinetin búdjettik quraldar týraly aıtty.
Otyrys qorytyndysy boıynsha ortalyq memlekettik jáne jergilikti atqarýshy organdar úshin birqatar usynymdar ázirlendi.