Qazaqstan PISA-2022 halyqaralyq zertteýiniń qorytyndysy boıynsha matematıka jáne jaratylystaný ǵylymdarynan top 50 eldiń qataryna endi, dep habarlaıdy almaty-akshamy.kz QR Bilim mınıstrligine silteme jasap. Elimizdiń bilim reıtıńin arttyrýǵa Almaty qalasy úlken úles qosqany qýantady.
PISA zertteýiniń jahandyq reıtıńi - bilim sapasyn baǵalaýdyń mańyzdy halyqaralyq júıeleriniń biri. QR Bilim mınıstrliginiń málimetinshe, oqýshylar 81 eldiń ishinde matematıkadan 46 oryn, oqýdan 61 oryn, jaratylystaný páni boıynsha 49 oryndy ıelendi.
Bul rette, Almaty qalasy oqýshylarynyń barlyq ulttyq jáne halyqaralyq reıtıńter boıynsha kórsetkishteri elimizdiń basqa óńirlerimen salystyrǵanda turaqty joǵary bolyp qalýda. PISA-2022 zertteýiniń nátıjeleri boıynsha el bólinisinde Almaty qalasy «matematıkalyq saýattylyq» jáne «jaratylystaný saýattylyǵy» baǵyttary boıynsha birinshi orynǵa ıe boldy.
Máselen, matematıkalyq saýattylyq boıynsha Almaty qalasynyń ortasha baly– 453 qurady, bul el boıynsha ortasha baldan (425 bal) joǵary.
Ǵylymı-jaratylystaný saýattylyǵy boıynsha Almaty qalasynyń ortasha baly – 458, el boıynsha ortasha baldan (423 bal) asyp tústi.
Sonymen qatar, oqý saýattylyǵy salasynda Almatynyń ortasha baly 423-ti qurady, bul el boıynsha ortasha baldan da joǵary (386 bal). Oqý saýattylyǵy boıynsha Almaty qalasy el boıynsha jalpy reıtıńte 3 orynǵa ıe boldy.
Qoryta kele, Almaty PISA-2022 halyqaralyq zertteýiniń matematıkalyq jáne jaratylystaný saýattylyǵy baǵyttary boıynsha kóshbasshy orynǵa ıe bolyp, qalamyzdyń bilim berý júıesiniń úlken jetistigin kórsetedi.
