Órkenıetten shet qaldyq degen Almaty oblysyndaǵy Kóktoǵan eldimekeniniń jurty ákimdik ókilin qurdaı jorǵalatty. Sebebi aýylda buǵan deıin de birneshe márte kóterilgen másele áli kúnge deıin sheshimin tappaı keledi. Aýyz sýdyń tapshylyǵynan halyq mal ishken qudyqqa barýǵa májbúr, dep habarlaıdy Almaty-akshamy.kz Almaty.tv-ge silteme jasap.
Sý alatyn qubyrdyń qasy qoqys, mańynda qańǵyǵan ıtter de júredi. Tirshilik kózin izdegen jurttyń basqa amaly joq.
«Ortalyqta bir-aq kolonka. Biz jaqta sý joq. Ózimiz qazdyrdyq, biraq ol sýdy ishýge múmkin emes», – dedi Kóktoǵan aýylynyń turǵyny Sánıa Sýanbekova.
Aýyldyń taǵy bir ózekti máselesi – tozyǵy jetken myna bir elektr baǵandary. Ótken ǵasyrda qaǵylǵan qazyqtar búginde qulaıyn dep tur. Turǵyndardyń aıtýynsha, keıde elektr symdary úzilip, aýa-raıy ózgerse boldy, eldimeken jaryqsyz otyrady.
«Jel bolǵanda, jaryq joq, óship qalady. Tońazytqysh istemeı qalady», – dedi Kóktoǵan aýylynyń turǵyny Sadyq Baımuhanbetov.
Turǵyndardyń aıtýynsha, áleýmettik jeli bylaı tursyn, keıde telefonmen tildesý qıyn.
«Jedel járdem shaqyrsaq, jolǵa shyǵady. Biraq taba almaı, sandalyp júredi. Nege? Sebebi bizde ınternet atymen joq. Joldy túsindireıin desek, qońyraý shalýdyń ózi múmkin emes», – dedi Kóktoǵan aýylynyń turǵyny Valentına Martıanova.
Ákimdik ókili aýyldaǵy máseleniń bárin birtindep sheshýge tyrysyp jatqanyn aıtyp aqtaldy. «Aýyldaǵy barlyq kem-ketikten habarymyz bar. Balalardy mektepke tasý, joldy jóndeý, jaryq júrgizý, sý tartý syndy másele máslıhatta qaralyp jatyr. Qarjy bólinse, sheshiledi», – dedi Eltaı aýyldyq okrýgi ákiminiń orynbasary Birjan Belǵojaev.
Ákimdik ókiliniń sózine sensek, kelesi jyly aýyldy jaryqpen qamtý jumysy bastalmaq. Tipti, jobasy da daıyn eken. Al ázirge jurt dalada jatqan qubyrdan sý iship, ınternetsiz bir-birine hat joldap, amaldaı turýǵa májbúr.