Tuzdybastaý aýylynda 22 myń adam turady
«Aptap ystyqta aýyz sýsyz qaldyq». Osylaı dep arnamyzǵa júgingen Almaty oblysy Tuzdybastaý aýylynyń turǵyndary 2 aıdan beri tirshilik nárinsiz otyrmyz dep shaǵymyn aıtty, dep habarlaıdy Almaty-akshamy.kz Almaty.tv-ge silteme jasap.
Tamshy sýdan taryqqan Tuzdybastaýlyqtardyń aıtýynsha, ákimdiktiń tabaldyryǵyn tozdyrǵaly talaı jyl bolypty. Ýádege toıǵan halyq shelegin arqalap ákimdik ǵımaratyna barýdy ádetke aınaldyrypty. Alaıda máseleniń sheshiler túri joq.
«2 aı boldy sý joq. Men 6 kýb baseındi 18 myńǵa satyp aldym. Baseındi sýǵa toltyryp, ishemiz», – dedi Tuzdybastaý aýylynyń turǵyny Zakır Turdymámetov.
«Sý joq, syzdyqtap aǵatyn edi, ol da bolmaı tur. Túngi saǵat 22:00-de sý beredi, keıde tańǵa deıin kútip júremiz. Qolymyzdy daladan jınaǵan sýmen jaýamyz», – dedi Tuzdybastaý aýylynyń turǵyny Gúlmıra Qurmanbaeva.
Al aýyl adamdarynyń aryzyn tyńdaýǵa kelgen «Talǵar sý» mekemesi máseleniń sheshimin tek memleketke ótken soń ǵana sheshýge bolady dep sendirdi. Iaǵnı jekeniń jeteginde ketken sý qubyrlaryn bir aryq jelisine qosý kerek.
«Tarıftiń baǵasy osy kúnge deıin Tuzdybastaý aýyldyq okrýginde 122 tıyn bolyp kelgen. Jeke kompanıalarmen kelisimshartta kórsetilip turady, biz soǵan saı jumys isteımiz», – dedi «Talǵar sý» sharýashylyq júrgizý quqyǵyndaǵy MKK basshysy Qýatbek Smaǵulov.
22 myń halqy bar Tuzdybastaý aýylynda aýyz sý máselesi jaýyr bolǵaly qashan. Aqjaǵylalar bul máseleni bir jaqty etemiz dep sendirdi.
«Aýdan tarapynan aqsha bólindi dep otyrmyz. 90 mıllıon shamasynda PZD jasaýǵa, ishinde kanalızasıasy da, sý qubyry da engizdik. Aýystyrý úshin qarajat qarastyrylǵan», – dedi Tuzdybastaý aýyldyq okrýginiń ákimi Mıras Baımoldanov.
Aýyl mańynda salynyp jatqan 12 shaqyrymdyq magıstraldy sý qubyry aıaqtalsa, aýyl halyqynyń qajetine jarar edi deıdi Tuzdybastaý ákimi. 250 metr sharshy kýbty quraıtyn qos qudyqtyń qurylysy aldaǵy qarasha aıynda aıaqtalmaq. Al ázirge jergilikti jurt 1968 jyly salynǵan eski qubyrdan sý kútýge ıakı satyp alyp ishýge májbúr.