Topta 21-46 jas aralyǵyndaǵy jeti adam bolǵan.
Almaty oblysynyń PD uıymdasqan qylmysqa qarsy kúres basqarmasynyń qyzmetkerleri vedomstvonyń arnaıy jasaǵymen birlesip, Almaty jáne Jetisý oblystarynyń, sondaı-aq Almaty qalasynyń aýmaǵynda bopsalaýshylar tobyn ustady, dep habarlaıdy Almaty-akshamy.kz Polisia.kz-ke silteme jasap.
«Bul fakt polısıada QR QK-niń 194-baby 2-bóliginiń 2-tarmaǵy (Bopsalaý) boıynsha tirkelgen. Aıta keteıik, aǵymdaǵy jyldyń 11 naýryzynda Qaskeleń qalasyndaǵy qoımalardyń biriniń aýmaǵynda joǵaryda atalǵan toptyń qatysýshylary sheteldik azamatqa qatysty kúsh qoldanyp, qoqan-loqqy jasaý arqyly iri kólemde aqsha bopsalaǵan», – dedi Almaty oblysy PD uıymdasqan qylmysqa qarsy kúres basqarmasynyń bastyǵy Dýlat Qaıyr.
Ustalǵandar qamaýǵa alyndy.
«Qazirgi ýaqytta kúdiktilerdiń basqa da osyǵan uqsas qylmystarǵa qatysy bar-joǵyn tekserýmen barlyq qajetti tergeý áreketteri júrgizilýde. Osy jumystardyń nátıjeleri boıynsha is materıaldary túpkilikti sheshim qabyldaý úshin sotqa jiberiletin bolady», – dedi Dýlat Qaıyr.