Qurylysy eki aıda aıaqtalǵanyn aıtqan jergilikti bılik kópir mańyndaǵy joldy da jóndepti.
«Qylkópirden qutyldyq». Osylaı degen Almaty oblysy Kóktal aýylynyń turǵyndary eki aýyldy jalǵaıtyn eski ótkeldiń jańarǵanyn aıtyp qýanyp otyr. Eldi meken halqy osydan úsh aı buryn tozyǵy jetken kópirden ázer ótemiz dep arnamyzǵa suhbat bergen edi. Aýyl adamdarynyń sózinshe, kópir qurylysynyń jumysy sol kópshiliktiń aryzynan keıin bastalǵan, dep habarlaıdy Almaty-akshamy.kz Almaty.tv-ge silteme jasap.
Aýyl arasyn jalǵaıtyn jalǵyz joldyń tozyǵy jetkenin jurt jıi aıtyp kelipti. Eki myńǵa jýyq halqy bar aýyldyń mektep balasy da dál osy kópirden ótetin.
«Eski kópirde júrý óte qıyn edi. Ózimiz de talaı óttik, osy máseleni kóterip edik. Jańa kópir paıda boldy, jolymyz jaqsy», – dedi Kóktal aýylynyń turǵyny Ańdas Qurmanbekov.
Aryzyn aıtqan aýyl adamdary qalaǵa qatynaıtyn jalǵyz joldan ótý úshin kólikti de qaldyryp ketetinin aıtqan bolatyn.
«Almaty» telearnasyna rahmet! Jaǵdaıymyzdy kórip, ákimshiliktiń adamyn shaqyryp, jasatyp berip jatyrsyzdar. Kóńilimiz kóterilip qaldy», – dedi Kóktal aýylynyń turǵyny Bınur Qalmurzaeva.
Qurylysy eki aıda aıaqtalǵanyn aıtqan jergilikti bılik kópir mańyndaǵy joldy da jóndepti. Alaıda áli de kem tustary baryn jasyrmady. Ol olqylyqtar aldaǵy jyly tolyq aıaqtalady eken.
«Almaty» telarnasy kelip túsirdi. Oǵan deıin tender jarıalanǵan. Jol bóliminiń bastyǵy da kelgen. Joldyń standarty boıynsha 6 metr ı 1,30 metr jaıaý júrginshiler jolyna jóndeý júrgizildi», – dedi Qaınar aýyldyq okrýgi ákiminiń orynbasary Nurbol Eskenbaev.
Kópir qaýipsizdigin qamtamasyz etý úshin oǵan qorshaý ornatý da qarastyrylypty. Al betonnan quıylǵan kópir Qaınar aýyldyq okrýgindegi Kóktal aýylyn basqalarmen jalǵaıtyn jalǵyz jol bolyp esepteledi.