Óner mektebine de Zamanbek Nurqadilovtiń esimi berildi.
Kegen aýdanynyń ortalyǵynda memleket jáne qoǵam qaıratkeri Zamanbek Nurqadilovke arnalǵan eskertkish-bústtiń ashylý saltanaty ótti, dep habarlaıdy aqshamnews.kz
Oblystyq ákimdiktiń málimetinshe, bul is-shara memleket basshysy Qasym-Jomart Toqaevtyń tapsyrmasy aıasynda júzege asyrylǵan.
Eskertkishtiń ashylý rásimi Zamanbek Nurqadilov atyndaǵy óner mektebiniń alańynda uıymdastyryldy. Saltanatty sharaǵa memleket jáne qoǵam qaıratkerleri, aqyn-jazýshylar, tanymal tulǵalar men qaıratkerdiń otbasy músheleri qatysty. Eskertkishti oblys ákiminiń orynbasary Nurjan Qudaıbergenov, qoǵam qaıratkerleri Toqqoja Estenov pen Bolat Nurǵazıev jáne Zamanbek Nurqadilovtiń uly Qaırat Nurqadilov ashty.
Oblys ákiminiń orynbasary óz sózinde qaıratkerdiń el damýyna qosqan zor úlesin atap ótip, onyń eńbeginiń ult tarıhynda máńgi saqtalatynyn jetkizdi:
Bul eskertkish – halqymyzdyń qaıratkerge degen shynaıy qurmetiniń belgisi. Ult janashyry retinde Zamanbek Nurqadilov el egemendiginiń nyǵaıýyna eleýli úles qosty. Osyndaı tulǵalardyń eńbegin urpaqqa mura etý – bizdiń ortaq paryzymyz. Sondaı-aq, bıiktigi 4,5 metr bolatyn bul týyndynyń avtorlary Aıdos Búrkitbaev pen Tımýr Nurmuhametovke alǵysymyzdy bildiremiz.
Saltanatty rásimnen keıin qatysýshylarǵa Zamanbek Nurqadilovtiń ómiri men qyzmeti týraly «Ne tolko o sebe» atty kitaptyń 300 danasy taratyldy.