Zaýyt basshysy zańǵa baǵynbaı otyr
Almaty oblysy Qaınazar aýylynda kirpish zaýytynyń jumysyna kópshilik narazy, dep habarlaıdy Almaty-akshamy.kz Almaty.ty-ge silteme jasap.
Arnamyzǵa aryzyn aıtyp, suhbat bergen aýyl azamattarynyń aıtýynsha, zaýytty sotqa berip, jeńip te alǵan. Alaıda aýyl ortasynan oıyp shuńqyr qazyp, kirpish shyǵaryp jatqan zaýyt basshysy zańǵa baǵynbaı otyr.
Aýyldyń aýmaǵyn keńeıtemiz dep bólingen jerge 2006 jyly kirpish zaýytyn salynǵan. Turǵyndar bul jerde zaýyt bolatynyn bilmepti. Tútini býdaqtap, tozańy tutas aýyldy ala bastaǵanda ǵana kórgen.
«Ekiniń birinde, kishkentaı balalarǵa deıin alergıa paıda boldy. Aptekadan dári satyp alyp, bári qoldanady. Bul jer jasyl jaılaý edi, qazir aral sıaqty shań, topyraqqa aınaldy», – dedi Qaınazar aýylynyń turǵyny Berik Dýanbekov.
«2022 qarasha aıynda zań tolyq kúshine endi. Halyqty eskerip otyrǵan joq, zańdy belshesinen basyp otyr. Olarǵa suranys kóbeıgen mezgildi jumys isteýge múmkinshilik berip otyr. Sondyqtan sot oryndaýshylardyń isine kúmánmen qaraımyz», – dedi Qaınazar aýylynyń turǵyny Nurjan Qalıev.
Úkim shyqsa da, úıip-tógip kirpish shyǵaryp jatyr degen zaýyttyń basshysy, bazynasyn aıtqan buqarynyń aldynda boı kórsetpedi. Tek ózin zańdy ókilimin dep tanystyrǵan azamat qaqpa aldynda jaýap berip, zaýyt jumys istemeıdi dep sendirdi.
«Qoldaryńyzdaǵy qaýlyǵa qatysty qazir jumys istemeıdi. Men bul jerde zańgermin. Basshylyq bolmaǵandyqtan, ishke kirgize almaımyn», – dedi kirpish zaýytynyń zańgeri Nurjan Maqsatov.
«Zańdy tulǵasynyń aıtyp turǵan sózin estidińiz ǵoı. Biraq tútin burqyrap, zaýyt istep tur. Jańa shyǵarylǵan kirpish tur», – dedi Qaınazar aýylynyń turǵyny Baýyrjan Jańabaev.
Bes myń halqy bar Qaınazar aýylynda tórt kirpish zaýyty bar eken. Onyń bireýin aýyl jurty jabylyp júrip japqyzǵan. Al qalǵany qysh qaqtap, kirpish kúıdirip, sol kúıi jumys istep jatqan kórinedi. Al halyq narazy bolǵan myna zaýyttyń keptirgish peshine qatysty qaýlynyń oryndalmaı jatqanyn aýyl ákimi de rastaıdy.
«İs sot oryndaýshylaryna berildi» deıdi. Zaýyt jumysy júrip jatyr. Aýdandyq sot oryndaýshylary kelip buzamyz dese, óz tarapymyzdan atsalysýǵa daıynbyz», – dedi Rahat aýyldyq okrýginiń ákimi Qaısar Bógispaev.
Zaýyttyń zańdy ókili biz qoıǵan saýaldardan qansha bultarsa da, zaýyt ishinde júk kólikteriniń qaıdan júrgenin túsindirip bere almady. Zań talabymen ǵana júretinin aıtyp, aqtaldy.
«Belgili obektiniń ǵana buzylýyna sheshim shyqqan ǵoı. Barlyq qyzmetti toqtatýǵa sheshim shyqqan joq. Zańdy kúshine engen joq. Biz shaǵymdanyp otyrmyz», – dedi kirpish zaýytynyń zańgeri Nurjan Maqsatov.
Talabyn aıtqan turǵyndar tarqasa bastap edi, zaýyt ishindegi júk kólikteri de jónine ketti. Qansha jasyrǵanymen, zaýyttyń áli jumys istep turǵany anyq.