Almaty oblysynyń polıseıleri qyzmet babynda qaza tapqan áriptesterin eske aldy.
Almaty oblysynyń İle aýdanynda qyzmettik mindetin atqarý kezinde qaza tapqan qyzmetkerge arnalǵan estelik taqtasynyń saltanatty ashylýy ótti, dep habarlaıdy Almaty-akshamy.kz Polisia.kz
«2000 jyly mılısıa serjanty Manas Jumadilov qyzmet babynda erlikpen qaza tapty. Kúndelikti kezekshilik kezinde oǵan Boroldaı aýylyndaǵy jeke sektorlardyń birinde qylmyskerdiń turǵany týraly habarlama túsken. Oqıǵa ornyna barǵan ol buryn sottalǵan páter tonaýshyny óz betinshe ustaý áreketin jasaǵan. Alaıda qylmyskerdiń qolyndaǵy pyshaqty baıqamaı, onyń qurbany boldy. Aýyr jaraqat alǵanyna qaramastan, Manas qylmyskerdi áriptesteri oqıǵa ornyna jetkenshe sońyna deıin ustady. Ókinishke oraı, alǵan jaraqaty saldarynan mert boldy», – deıdi oblystyq tárbıe jáne kadr jumysy basqarmasynyń basshysy Abylaı Nurymov.
Memorıaldyq taqta kadet synyp oqýshylary oqıtyn Ótegen batyr aýylynda ornalasqan №7 orta mektepte saltanatty túrde ashyldy.
«Manas 27 jasynda erlikpen qaza tapty. Ol qaıtys bolǵannan keıin İİİ dárejeli “Aıbyn” ordenimen marapattaldy. Mılısıa serjanty Jumadilovtyń erligi óskeleń urpaqqa úlgi, óıtkeni ómirdegi ant pen tańdaǵan jolǵa adaldyq úlken qurmet sezimin týdyrady», – dep qosty A.Nurymov.
Qazaqstan Respýblıkasy táýelsizdik alǵan jyldary qyzmettik mindetterin oryndaý kezinde 818 qyzmetker qaza taýyp, 4634-i jaraqat aldy. Olardyń kópshiligi elge abyroımen qyzmet etip, azamattardy qylmystyq qol suǵýshylyqtan qorǵap, zańdylyq pen tártipti qamtamasyz etý jolynda mezgilsiz dúnıeden ótti.