Arnaıy operasıalar kúshteriniń parashúttik daıarlyq ortalyǵynda jeke-komandalyq birinshilikke klasıkalyq parashút sporty men toptyq parashút akrobatıkasynan Qazaqstan Respýblıkasy men Qarýly kúshterdiń 29-ashyq chempıonaty ótip jatyr, dep habarlaıdy Almaty-akshamy.kz Inform.kz-ke silteme jasap.
Qorǵanys mınıstrliginiń málimetinshe, atalǵan saıysqa Arnaıy operasıalar kúshteriniń, Desanttyq-shabýyldaý áskerleriniń, Áskerı-áýe kúshteriniń, Ulttyq ulannyń, «Otan» QB respýblıkalyq aeroklýbynyń, Qaraǵandy qalasynyń avıasıalyq qutqarý-izdestirý ortalyǵynyń, Batys Qazaqstan oblysy Oral qalasynyń mamandandyrylǵan balalar-jasóspirimder sporttyq-tehnıkalyq mektebiniń komandalary qatysýda. Barlyǵy 17 komanda, olardyń ishinde halyqaralyq dárejedegi sport sheberleri, sport sheberleri men sheber ataǵyna úmitkerler, razrádty sportshylar da bar.
«Qarýly kúshterdiń basshylyǵy áskerlerdiń jaýyngerlik daıarlyǵynyń tiregi sanalatyn áskerı-qoldanbaly sport túrlerin damytýǵa múddeli. Solardyń biri – parashút sporty. Chempıonat barysynda tıisti qaýipsizdik sharalary saqtalyp, joǵary deńgeıde ótedi dep senemin. Saıys ádil ótip, naǵyz myqtylar jeńiske jetsin», - dedi QRQK Arnaıy operasıalar kúshteriniń qolbasshysy polkovnık Bolat Jorabaev.
Alǵashqy bolyp parashútpen sekirgen Arnaıy operasıalar kúshteriniń qolbasshysy Bolat Jorabaev jarysty ashyp berdi. Saıysta myqtylyǵyn synaýshylar qoný dáldigin belgilep, 900-1200 metr bıiktikten jeke jáne toptyq sekirýlerdi jáne 2200-2500 metr bıiktikten jeke jáne toptyq akrobatıkalyq sekirýler oryndaıdy.
Chempıonattyń qorytyndysyna sáıkes parashút sportynan Qazaqstan men Qarýly kúshterdiń qurama komandalary jasaqtalady.