Dál qazir oblysta 19 mektepke kúrdeli jóndeý júrgizilip jatyr. Onyń 9-y bıylǵy oqý jylyna úlgermeıdi.
Almaty oblysynda jóndeý jumystary bitpegen mektepterdiń oqýshylary ákimdik, mádenıet úıinde oqıdy, dep habarlaıdy Almaty-akshamy.kz QazAqparatqa silteme jasap.
Bıylǵy jańa oqý jylynda ashylmaıtyn mektepterdiń biri - Taldyqorǵan qalasyndaǵy Ostrovskıı atyndaǵy mektep. Bul bilim ordasynda kúrdeli jóndeý jumystar maýsym aıynda ǵana bastalǵan. Mekteptiń tórt qabyrǵasy túgeldeı qyrylyp, qyzyl kirpish kúıinde tur. Edenderin de túgel alyp tastaǵan. Bilim basqarmasynyń aıtýynsha, jumystar jyl sońyna deıin aıaqtalady. Sondyqtan atalǵan mektepte oqyp júrgen 1149 bala kúzde qalanyń ár jerine sabylyp, bilim alýǵa májbúr. Keıbiri tipti kolej ǵımaratynda oqıtyn bolady.
«Bizde Taldyqorǵan gýmanıtarlyq kolej bar. Iaǵnı, mektepaldy daıarlyq toptary jáne birinshi synyp oqýshylary sol gýmanıtarlyq-tehnıkalyq kolejde bilim alady. Sol jerden kabınetter bólip otyr. 9 mektepte kúrdeli jóndeý kesh bastalýy jáne oǵan qarjynyń kesh bólinýi jaǵdaıdy qıyndatty. Sondyqtan oqýshylarǵa qolaıly jaǵdaı jasalyp, mektep bitkenge deıin qaı ǵımaratta oqysa, sol jerge jıhazdar qoıylyp, oqý prosesi úzdiksiz ótedi dep josparlap otyrmyz», - dedi Almaty oblystyq bilim basqarmasy basshysynyń orynbasary Aıjan Adambekova.
Sondaı-aq Aqsý aýdanynyń Saǵabúıen aýylyndaǵy Toqtarov atyndaǵy mektepke de kúrdeli jóndeý júrgizilip jatyr. Jańa oqý jylynda bul mekteptiń 172 oqýshysy aýyldyq ákimdiktiń ǵımaratynda bilim alatyn bolady. Al, Panfılov aýdanynyń Sarybel aýylyndaǵy Kobıkova atyndaǵy mekteptiń 286 oqýshysy osy aýyldyń mádenıet úıinde baryp bilim alady. Sondaı-aq Raıymbek aýdanynyń Tuzkól aýylyndaǵy Musaqulov atyndaǵy mekteptiń 87 oqýshysy osy aýyldyń ákimshilik ǵımaratynda bilim alady. Al Talǵar qalasyndaǵy N3 mekteptiń 1945 oqýshysy Qonaev atyndaǵy kolejge jáne Evrazıalyq ýnıversıtetke baryp oqıdy.