Júrgizýshige qatysty is qozǵaldy
Almaty oblysynda jylqyny kólikpen ádeıi basqan júrgizýshige qatysty ákimdik túsinikteme berdi, dep habarlaıdy Almaty-akshamy.kz QazAqparat-qa silteme jasap.
«İle aýdanynda jol talǵamaıtyn kólikpen jylqyny ádeıi basqan oqıǵa shildeniń 16-da bolǵan. Qazir júrgizýshige qatysty QR Qylmystyq kodeksiniń 316-baby «Janýarlarǵa qatygezdik jasaý» deregi boıynsha is qozǵaldy. Oblystyq polısıa departamentiniń baspasóz qyzmeti oqıǵa basshylyqtyń nazaryna alynǵanyn jetkizdi»,- dep jazdy óziniń Facebook-tegi paraqshasynda Almaty oblysy ákiminiń baspasóz qyzmetiniń jetekshisi Ǵalymurat Júkel.
Aıta keteıik, er adamnyń jol talǵamaıtyn kólikpen jylqyny qasaqana túrde basyp jatqan vıdeosy jelige taraaǵan bolatyn. Vıdeo avtory jylqyny basqan adamdy polısıa alyp ketip, artynsha bostandyqqa jibere salǵandyǵyna shaǵymdanady.
«Myna jigit keshe bizdiń jylqymyzdy kólikpen basqan. Keshe túnde polısıa alyp ketken. Al búgin bostandyqta júr. Bul ne masqara!» - deıdi vıdeoǵa túsirip turǵan avtor.
Al polısıa kúdiktiniń arnaıy qolhatpen bosatylǵanyn habarlady.
«16 shilde kúni İle aýdanyndaǵy Mejdýrechınsk aýylynyń 38 jastaǵy turǵyny kórshisimen janjaldasyp, onyń jylqysyn qasaqana túrde jol talǵamaıtyn kólikpen basqan. Qazir kúdiktiniń ústinen QR QK 316 baby (Janýarlarǵa qatygezdik jasaý) boıynsha is qozǵaldy. Arnaıy qolhatpen bosatyldy», - delingen Almaty oblystyq polısıa departamenti baspasóz qyzmetiniń habarlamasynda.