Sý resýrstary jáne ırrıgasıa mınıstrliginiń málimetinshe, Almaty oblysy İle aýdanynda sýarmaly sý tapshylyǵy joq, dep habarlaıdy aqshamnews.kz
Almaty oblysy İle aýdany Aqshı aýylynda 100 ga egistik alqap sýarylmaı, qýrap jatyr degen aqparat taraǵan bolatyn. Mınıstrlik jumys tobyn quryp aýmaqty baryp teksergen.
"Sý mınıstrliginiń jumys toby Almaty oblysy İle aýdanynyń Aqshı aýylynda sharýa qojalyqtary men aýyl ákimdigi ókilderimen kezdesti. Aqshı aýylynda sý tapshylyǵy saldarynan 100 gektar egis alqabynyń qurǵap jatqany týraly buryn taraǵan aqparattyń shyndyqqa janaspaıtyny anyqtaldy", - dep jazdy vedomstvodaǵylar.
Shyn máninde "Qazsýshardyń" "D.Qonaev atyndaǵy Úlken Almaty kanaly" fılıalymen sý jetkizý boıynsha kelisimsharttary bolmaǵandyqtan, 9 gektar jer sýarylmaǵan.
"Eldi mekenge sý Kúrti sý qoımasynan oń jaǵalaý magıstraldyq kanaly arqyly jetkiziledi. Sýarý maýsymy 16 mamyrda bastalǵan. Al Úlken Almaty kanalynyń fılıaly sáýir aıynyń aıaǵynda sharýalardy kelisimshartqa otyrýǵa shaqyra bastaǵan", - deıdi mınıstrlik.
Mamyr aıynyń basynda Kúrti sý qoımasyndaǵy sý kólemi 101,68 mln tekshe metr boldy. Búginge deıin Oń jaǵalaý magıstraldyq kanaly arqyly 3,6 mln tekshe metr sý berildi, Sol jaǵalaý magıstraldyq kanaly arqyly 6 mln tekshe metrden astam sý berildi.
Sý berý jumystarynyń keleshekte keshigýine jol bermes úshin jumys tobynyń ókilderi fılıalǵa sýarý maýsymy bastalmaı turyp sý berý jóninde kelisimsharttar jasasýdy usyndy. Sondaı-aq kanaldardy mehanıkalyq ádispen tazartý máselesi qarastyrylyp jatyr.