Jaǵdaıdy zaýyttyń basshysy da túsindirip bere almady
«Teri zaýyty turmysymyzǵa kedergi keltirdi». Osylaı degen Almaty oblysy Eńbekshi aýylynyń turǵyndary aýyl ishindegi «teri zaýytynan shyqqan ıis qolqany qabady» deıdi. Tipti, eldimekendi túgel jaılap ketken. Aýlasynda appaq qurt órip júrgen óndiris ortalyǵyna búgin tutas aýyl kelip, zaýyttyń jabylýyn talap etti. Jaǵymsyz ıis shyqqan nysanǵa turǵyndar buǵan deıin de shaǵym aıtyp kelgen. Alaıda aýasy buzylyp alqymnan alǵanda amalsyz bas kóterýge májbúr bolǵan, dep habarlaıdy Almaty-akshamy.kz Almaty arnasyna silteme jasap.
«Biz balalarymyzdyń densaýlyǵyn oılaýymyz kerek qoı, aınalaıyn. Senderde de otbasy, bala bar shyǵar», – dedi Eńbekshi aýylynyń turǵyny Alma Qojaqulıeva.
Buqara bazynasyn aıtqan jerdiń aýmaǵyn bir kúnde aralap bitirý múmkin emes. Zaýytqa jolaı ketseń shirkeı shaǵyp, shirigen ıis qolqany qabady. Al zaýyttyń túpki maqsaty – terini ılep, malǵa jem jasaý. Jaldanyp jumys isteıtin 9 jumysshy qazir aýlany jınap álek.
Bul ár jerde úıilip jatqan shómele emes, qolańsa ıisi qolqany alǵan qyryq myń teriniń bir bóligi ǵana. Mundaǵy jumysshylardyń aıtýynsha, terini qoqystan, qalaberdi qoradan jınap ákelgen. Al jaǵymsyz ıistiń jaılap ketýin zaýyttyń basshysy da túsindirip bere almady.
«Bárin biz qys boıy jınadyq. Jańbyr jaýǵanda, kún jylyǵanda ıis shyǵady. Biraq veterınar ınspeksıasy bar, olar dezınfeksıa jasaıdy. Búkil teri tek qoımanyń ishinde saqtalady. Bárin túsinemin, bizde qatelik kóp», – dedi teri zaýytynyń basshysy Erzat Raqymjanov.
Turǵyndar «jaýaptylar múlde tekseris júrgizbeıdi, tipti negizgi jer telimin bergen mekemeni de jaýapqa tartý kerek» dep otyr. Óıtkeni aýyl ishinen jumys bastaý úshin jergilikti halyqpen eshkim keńespepti.
«Narhoz deımiz ǵoı, Almaty qalasyndaǵy ýnıversıtettiń jeri eken. Halyqqa qıanat istep jatyr», – dedi Eńbekshi aýylynyń turǵyny Renat Qursabaev.
Al aýyl bıligi máseleden habardar. Biraq naqty zaýyttyń jumysyna tosqaýyl qoıa almaıtyn olar tıisti taraptarǵa aryz jazǵanyn jetkizdi.
«Jumysy talapqa saı emes. Sol sebepti dezınfeksıa jasaý keregin aıtyp, «Batý-Agro» JSHS-ǵa eskertý berildi. Bul jer Narhozdyń fılıalyna tıesili, olar kelisimshartqa otyrǵan», – dedi Áıteı aýyldyq okrýgi ákiminiń orynbasary Ákimjan Júnisov.
Al kópshilik jerdiń ıesi degen Rysqulov atyndaǵy oqý ornynyń mamandary mardymdy jaýap bergen joq. Resmı hatqa ǵana jaýap beretinin aıtty. Al aýyl aryzyn aıtqan óndiris ortalyǵyna endi sanıtarlyq baqylaý mekemesi tekseris júrgizedi.