Topyraqtan zardap shekken eki otbasy da qazir jamaý-jamaý úıdiń buryshynda kúneltip jatyr
Almaty oblysynda 190 jer telimi qulaýy múmkin. Olardy «Qazseldenqorǵaý» qyzmetkerleri qaýipti aımaqtardyń tizimine engizip, dabyl qaǵyp jatyr, dep habarlaıdy Almaty-akshamy.kz Almaty.tv-ge silteme jasap.
Aqpannyń aıaǵynda aıaqasty jar qulap, topyraq basyp qalǵan Besaǵashtaǵy eki úıdiń jaǵdaıy áli retke kelmegen. Sebebi qabaqty tegisteýi kerek bolǵan merdigerlerdiń bıikke shyǵýǵa batyly barmaǵan.
«Tenderdiń nátıjesi shyqty, utqan merdiger kompanıa jumys istemeıdi. Ol istemegen soń, zań tarapyna ekinshi ret berýimiz kerek. Odan keıin turǵan 12 adam qatysty tenderge. Jerdi 2006-2007 de jer qyldyryp shyǵaryp satqan. Jaýapkershilik birinshi kezekte úı salǵyzyp ruqsat bergen GASK degen kompanıa bar, arhıtektýra bar», – dedi Besaǵash aýyldyq okrýginiń ákimi Ernar Júnisov.
Al jumysymdy bastaǵaly bir jyl ǵana bolǵan Besaǵash ákimi apatty jer telimderi buryn satylǵanyn alǵa tartty. Al budan bylaı taýly aımaqta jer telimin berýge ruqsat berilmeıdi.
«Áýeli qulaǵan topyraqty rettese, sodan keıin úıdi jóndep beretinin aıtty. Úıge qalaı kiremiz, bilmeımin?» – dedi zardap shegýshi Baqyt Oryntaıqyzy.
Al topyraq opyrylǵan aımaqta taǵy 18 úıge de qaýip baryn mamandar ashyq aıtyp otyr. Óıtkeni keı turǵyndar jer ýchaskelirin keńeıtý maqsatynda jyralardy jasandy topyraqpen toltyryp, úı salǵan kórinedi.
«Taýly aımaq bolǵan soń jańbyr kóp jaýady. Sol kezde qaýip te kúsheıedi. Árıne jaýapkershilik bolýy kerek. Biraq kóp adam bundaı qaýiptiń baryn bilmeıdi. Osy jerdi satyp alǵanda eskertip, eshkim de túsindirmedi», – dedi Besaǵash aýylynyń turǵyny Baıansulý Qaramanova.
«Talǵar aýdanyna keletin bolsaq 43 opyrylý qaýipi bar ýchastok bar. Sonyń bireýi – Býrabaı shaǵynaýdanyndaǵy Baıanaýyl kóshesi. 2018 jyly Kólsaı kólderinde, 2017 jyly Talǵar qalasynyń Túıetaý aımaǵynda apaty jaǵdaı oryn alǵan», – dedi «Qazseldenqorǵaý» MM Talǵar óndiristik paıdalaný bóliminiń basshysy Mahamedın Bedelbekov.
Topyraqtan zardap shekken eki otbasy da qazir jamaý-jamaý úıdiń bir buryshynda kúneltip jatyr. Keıbiri ýaqytsha páter jaldap qalaǵa ketipti. Al apatty aımaqta aldyn-alý jumysyn júrgizip jatqan jumysshylar búgin-erteń bitpeıtinin ashyp aıtty.