Qaıyrymdylyq kerýeni attandy
Otqa oranǵan Torǵaı óńirindegi aýyldardyń jurtshylyǵyna memleket tarapynan tıisti kómekter istelip jatyr. Aldaǵy kezderi de qoldaýdan kende bolmaıtynyn Prezıdenttiń ózi aıtty. Sonymen birge qashanda qaıyrymdylyǵymen erekshelenetin qalyń el de órtten zardap shekken otandastary úshin qoldan kelgen járdemniń barlyǵyn jasaýǵa bilek sybana kiristi, dep habarlaıdy Almaty-akshamy.kz Aıqyn gazetine silteme jasap.
El basyna kún týǵanda Almaty oblysy da syrt qalmady. Alǵashqylardyń biri bop, Áýlıekól aýdanynyń turǵyndaryna birinshi kezekte qajetti bolyp sanalatyn azyq-túlik, tazalyq zattary men qurylys materıaldary jáne taǵy basqa da kerekti zattardy jóneltti.
Búgin Almaty oblysynan jasaqtalǵan qaıyrymdylyq kerýeni jalpy salmaǵy 105 tonnadan astam azyq-túlik pen taǵy da basqa dúnıelerdi tıep alyp, Qostanaı oblysyna attandy. Almaty oblysynyń turǵyndary osylaısha halyq basyna túsken ortaq aýyrtpalyqty barynsha jeńildetýge óz úlesterin qosýda.
Qonaev qalasyndaǵy front keńseniń basshysy Erasyl Tolymbekulynyń aıtýynsha, Almaty oblysynyń ákimdigi Qostanaı oblysynyń tıisti mekemelerimen alapat órttiń birinshi kúninen bastap turaqty baılanys ornatyp, elge úndeý tastap qaıyrymdylyq kómek jınaǵan.
«Qostanaı oblysynda bolǵan apatty jaǵdaıdy búkil elge kelgen synaq retinde qabyldadyq. Osyndaı qıyn-qystaý sátte qazaqstandyqtardyń aýyzbirshilik kórsetip jatqany qýantady. El Prezıdenti Qasym-Jomart Toqaev ta apatty aımaqqa arnaıy baryp, órtten zardap shekkenderdiń otbasylarymen jeke-jeke kezdesip, birde-bir otbasynyń járdemsiz qalmaıtynyn, Úkimet tarapynan barlyq qajetti kómekter bolatynyn aıtty.
Áýlıekól aýdanyndaǵy órtten zardap shekkenderge kómek kórsetý jónindegi jalpyhalyqtyq aksıaǵa ún qosqan Almaty oblysy birinshi qaıyrymdylyq kerýenimen 9 myń dana balalarǵa arnalǵan jaıalyq, 10 tonna qurylys materıaldary, 10 tonna kúnbaǵys maıy, 10 tonna taýyq eti, 3 tonna kespe, 7 tonna pıaz, 5 tonnadan alma men kúrish jáne taǵy basqa da tótenshe jaǵdaıda shuǵyl qajet bolatyn zattardy jóneltti. Birqatar memlekettik organdardaǵy qyzmetkerler óz erikterimen birkúndik jalaqylaryn qaıyrymdylyq kómekke aýdardy. Júk tıelgen kóliktermen birge 10 erikti torǵaılyqtarǵa kómektesýge ketti.