Keshe Cheh jerinde bizdiń Almaty tarıhı mýzeıiniń kórmesi ashyldy. Almaty qalasy ákimdiginiń jáne Qazaqstan Respýblıkasynyń Cheh respýblıkasyndaǵy Elshiligi, Praga qalasynyń merıasy men Praga qalasy mýzeıiniń qoldaýymen júzege asqan halyqaralyq kórme «Ýaqyt kerýeni» dep atalady.
Kórmeniń ashylý saltanatynda Praga qalasy mýzeıiniń basshysy Ivo Masek, Qazaqstannyń Cheh respýblıkasyndaǵy elshisi Baqyt Dúısenbaev, Almaty qalasy máslıhaty tóraǵasynyń mindetin atqarýshy Ásıa Aqanova, Almaty qalasy máslıhatynyń depýtaty Saltanat Serikova jáne Almaty qalasy mýzeıler birlestiginiń dırektory Lázzat Saǵyndyqova sóz sóıledi.
Sonymen qatar, mádenı is-sharaǵa Japonıa, Koreıa, Katar, Reseı, Túrkıa, Malaızıa koróldigi jáne basqa 20-dan astam memlekettiń elshileri qatysty.
Byltyr eki mýzeı arasynda yntymaqtastyq jónindegi memorandýmǵa qol qoıylǵan bolatyn. Bul kórme sonyń jemisi, yntymaqtastyqtyń naqty kórinisi. Yntymaq demekshi, Qazaqstan Respýblıkasy men Cheh Respýblıkasy arasyndaǵy dıplomatıalyq qatynastar 1993 jyly 1 qańtarda quryldy. Jyl ótken saıyn eki el arasyndaǵy mádenı baılanys osylaısha nyǵaıyp keledi.
Kórmeniń maqsaty – Qazaqstan Respýblıkasy men Cheh Respýblıkasy arasyndaǵy mádenı baılanystardy odan ári nyǵaıtý, sondaı-aq Uly dala halqynyń tarıhy jáne mádenıetimen, jalpy kóshpendiler mádenıetimen, atap aıtqanda kóshpeli qazaqtardyń dástúrlerimen, turmysymen, fılosofıasymen jáne dúnıetanymymen tanystyrý.
Almaty qalasy tarıhy mýzeıiniń «Ýaqyt kerýeni» kórmesi kelýshilerdi Uly dalany mekendegen halyqtyń tereń tarıhy men mádenıetimen tanystyryp, eki el arasyndaǵy mádenı dıalogty jalǵastyrady desek qatelespeımiz.
Praga tórine Almaty qalasy mýzeıler birlestigi qorynan 220-dan astam eksponat qoıyldy. Kórme qazaq halqynyń turmysyn, salt-dástúrin, qoldanbaly ónerin baıandaıtyn etnografıalyq jádigerler, mýzykalyq aspaptar men Almaty qalasynyń tarıhy men qazirgi ómirin kórsetetin fotosýretterge negizdelgen. Osy oraıda aıta keteıik, bizdiń jádigerler qoıylǵan Praga mýzeıi ornalasqan ǵımarat Hİİİ-HİV ǵasyrlarda boı kótergen, IýNESKO-nyń «Álemdik mura» tizimine engen.
– Búginde Almaty qalasy mýzeıler birlestigi elimizdiń qoǵamdyq jáne mádenı ómirine belsendi qatysyp keledi. Onyń úlesinde 2022-2024 jyldary erekshe damyǵan halyqaralyq yntymaqtastyqtyń keń baǵdarlamasy bar. Máselen, buǵan deıin Seýl (Koreıa Respýblıkasy), Stambýl (Túrkıa), Neapol (Italıa) jáne Vena (Avstrıa) qalalarynda úlken jetistikpen ótkizilgen halyqaralyq kórmelerdi ataýǵa bolady. Al Pragadaǵy «Ýaqyt kerýeni» osy halyqaralyq kórmelerdiń zańdy jalǵasy, – deıdi Almaty qalasy mýzeıler birlestiginiń dırektory Lázzat Saǵyndyqova.
Aıtýly mádenı is-shara barysynda Almaty qalasy mýzeıler birlestigi Túrki áleminiń «Eń úzdik mýzeıi» atandy. Sertıfıkatty TÚRKSOI Halyqaralyq uıymynyń Bas hatshysy Sultan Raev tabystady.
Eýropalyqtardyń nazaryna usynylǵan kórme tamyzdyń sońyna deıin jalǵasady.