Poıyz Almatydan erteń, 19 sáýirde attansa, Atyraýdan 21 sáýir kúni keri qaraı júredi.
Sý tasqyny bolyp jatqan óńirlerge jáne sol óńirlerden adamdardy tasymaldaý úshin "Qazaqstan temir joly" ulttyq kompanıasy Almaty men Atyraý arasynda taǵy bir qosymsha reısti iske qosyp otyr, dep habarlaıdy almaty-akshamy.kz.
Kompanıa málimetinshe, №215/216 "Almaty-Atyraý" poıyzy kelesi kestege sáıkes qatynaıdy:
Almatydan 19 sáýirde saǵat 13:40-ta jóneltilip, Atyraýǵa 21 sáýirde saǵat 15:32-de keledi;
Atyraýdan 21 sáýirde saǵat 23:16-da jóneltilip, Almatyǵa 24 sáýirde saǵat 03:50-de keledi.
"Qabyldanyp jatqan sharalar 700-den astam jolaýshyny qosymsha tasymaldaýǵa múmkindik beredi. Qosymsha poıyzǵa bıletterdi satý 17 sáýirde bastaldy. Bıletterdi komısıasyz bilet.railways.kz saıttan jáne vokzaldyń bılet kasalarynan satyp alýǵa bolady. Jolaýshylar poıyzdarynyń qozǵalys kestesi boıynsha anyqtamalyq aqparatty "1433" tegin nómiri boıynsha ala alady", – delingen kompanıa habarlamasynda.
Eske salaıyq, dál osyndaı, biraq bir baǵyttaǵy, ıaǵnı Atyraýdan Almatyǵa qatynaǵan qosymsha reıs 14 sáýirde de iske qosylǵan bolatyn. Poıyz jolaýshylaryn Almatyǵa 17 sáýirde jetkizdi.