Almaty polısıasy óz qyzmetine zamanaýı beınebaqylaý jáne beıne taldaý tehnologıalaryn engizýdi jalǵastyra otyryp, qoǵamdyq tártip pen balalardy qorǵaý salasynda eleýli qadam jasady.
Kámeletke tolmaǵandar isteri jónindegi ınspektorlar TargetEYE platformasyna qol jetkizip, oqýdan ótti. Bul Almaty qalasyndaǵy mektepter men balabaqshalardaǵy qaýipsizdikti baqylaýdyń tıimdiligin arttyrýǵa múmkindik berdi, dep habarlaıdy aqshamnews.kz. Polisia.kz-ke silteme jasap.
Almatyda biryńǵaı beınebaqylaý júıesin engizýdiń arqasynda kámeletke tolmaǵandar isteri jónindegi ınspektorlar óz jumystarynda taǵy bir taptyrmas quralǵa ıe boldy. Endi árbir ınspektordyń oqý oryndarynda ornatylǵan kameralardy jyldam qaraýǵa, beınejazbalar muraǵatyna jáne beınesaraptama oqıǵalaryna qol jetkizýge múmkindigi bar. Bul úzdiksiz baqylaýdy jáne bolǵan oqıǵalar men azamattardyń ótinishterine der kezinde jaýap berý múmkindigin qamtamasyz etedi.
– Almaty qalasy ákimdigi elimizde alǵash ret 2024 jyly memlekettik bilim berý jáne mektepke deıingi bilim berý mekemelerinde “Biryńǵaı qaýipsizdik júıesi” jobasyn sátti júzege asyrdy. 400-den astam mektep pen balabaqsha PD-nyń Jedel basqarý ortalyǵyna qosylǵan sıfrlyq kameralarymen, beınefondarmen, týrnıketter, dabyl túımelerimen jabdyqtaldy. Kúzet jáne órt dabyldary da engizildi. Qaýipsizdik júıesiniń barlyq elementteri birtutas qaýipsizdik ekojúıesine biriktirilgen. Bilim berý uıymdarynyń búkil aýmaǵyn qamtıtyn 22 000 kamera derekterdi biryńǵaı beınebaqylaý júıesine naqty ýaqyt rejıminde jiberedi. Ortalyqtandyrylǵan basqarý jáne derekterdi taldaý ınspektorlarǵa naqty ýaqyt rejıminde ne bolyp jatqanyn baqylaýǵa, negizgi analıtıkalyq kórsetkishter boıynsha aqparat alýǵa múmkindik beredi – kóp adamdardyń shoǵyrlanýynan jáne yqtımal tóbelesterden bastap dereý aralasýdy qajet etetin kúdikti jaǵdaılarǵa deıin. Máselen, júıe respýblıkalyq izdeýde júrgen adamdardy anyqtap, olardyń mektepke kirgenin tirkeı alady, – dedi Almaty qalalyq polısıa departamentiniń bastyǵy Arystanǵanı Zapparov.
Polısıa bastyǵynyń aıtýynsha, platforma bet-álpetter men oqıǵalardy avtomatty túrde taný úshin jasandy ıntellekttiń jetildirilgen algorıtmderi men beıne-analıtıkalyq modýlderdi paıdalanady, bul jaýap berý prosesin jyldamdatady.
– Algorıtmder kúdikti adamdardy olardyń keskininiń bólikteri nemese keskinderi boıynsha (mysaly, betperde nemese kózildirikpen jasyrylǵan jaǵdaıda) anyqtaýǵa, sondaı-aq bilim berý uıymdarynyń aýmaǵyndaǵy kúdikti jaǵdaılardy tanýǵa qabiletti. Bul balalar men jasóspirimderdiń ómirindegi qaıǵyly oqıǵalardyń aldyn alýǵa, olardyń ómiri men densaýlyǵyn saqtaýǵa kómektesedi. Sondaı-aq ınspektorlarǵa adamdardyń jappaı shoǵyrlanýyn baqylaýǵa, tóbeles nemese basqa qaqtyǵystar sıaqty yqtımal qaýipti jaǵdaılarǵa jyldam áreket etýge múmkindik beredi. Kartagrafıalyq qyzmetpen ıntegrasıa naqty ýaqyt rejıminde kúdiktiniń baǵytyn qurýǵa jáne basqa polısıa qyzmetterimen áreketti úılestirýge múmkindik beredi, – dedi Arystanǵanı Zapparov.