Qarjy naryǵyn retteu jáne damytu agenttígí Qazaqstanda baǵaly qaǵazdar naryǵy turaly jańa zań jobasyn ázírleu bastalǵanyn alǵash ret resmı túrde rastady.
Agenttík jańa zań jobasymen jūmys bastalǵanyn óz tóraǵasy Mádına Ábílqasymovanyń Europalyq qaıta qūru jáne damu bankíníń (EQDB) qarjy ınstıtuttary departamentíníń basqarushy dırektory Fransız Malıdjben kezdesuden keıín málímdedí.
Agenttík qor naryǵynyń tūraqtylyǵy men tıímdílígín arttyruǵa, ınvestorlardyń qūqyqtaryn qorǵaudy kúsheıtuge jáne ınnovatsıyalardy engízuge jaǵdaı jasauǵa baǵyttalǵan baǵaly qaǵazdar naryǵy turaly jańa zańdy ázírleuge kírístí, delíngen QNRDA habarlamasynda.
Vedomstvo ókílderíníń aıtuynsha, jahandyq qarjy júıesí jyldam ózgeríp jatqan qazírgí jaǵdaıda Qazaqstanǵa qor naryǵynda qūrylymdyq reformalar júrgízu qajet.
Zań jobasy turaly ne belgílí?
Mádına Ábílqasymova baǵaly qaǵazdar naryǵy turaly zańdy qaıta jazu josparlanyp otyrǵanyn qarasha aıynda ótken Qazaqstan qarjygerleríníń kongresínde jarıya etken. Ol kezde agenttík negízgí jūmysty 2026 jylǵa qaldyrudy kózdep otyrǵanyn aıtqan edí.
Bíz baǵaly qaǵazdar naryǵy turaly zańnyń normalaryn qarap shyqtyq. Kóptegen talaptar jetíldírudí qajet etedí, bír bólígí eskírgen. Mysaly, tsıfrlyq qarjy aktıvteríne qatysty ózgerísterdí bíz baǵaly qaǵazdar turaly zańǵa tíkeleı emes, bankter turaly ílespe zań jobasy arqyly engízuge májbúr boldyq. Sonyń saldarynan keıbír sáıkessízdíkter paıda boldy. Mūnyń bárín júıeleu qajet, degen bolatyn agenttík tóraǵasy.
Osylaısha, Qazaqstanda qor naryǵyn jańǵyrtuǵa baǵyttalǵan jańa zań jobasyn ázírleu ís júzínde bastalyp kettí.